नहीं रुकेगा ‘पठान’! आठव्या दिवशीही बॉक्स ऑफिसवर शाहरुखचीच हवा, हजार कोटींच्या जवळ पोहोचला

मुंबई- आपल्या नावाचा दबदबा तयार करणं म्हणजे काय हे जर शिकायचं असेल तर शाहरुख खानकडून शिकलं पाहिजे. बॉलिवूडचा बादशाह शाहरुख खान च्या ‘पठाण’ ने बॉक्स ऑफिसवर कोट्यवधींची कमाई केली आहे. सलग आठ दिवस छप्पडफाड कमाई करत त्याने अनेक सिनेमांना खुलं आवाहन दिलं आहे. विशेष म्हणजे शाहरुखच्या कारकिर्दीतील हा सर्वात मोठा हिट सिनेमा आहे. सुरुवातीच्या ट्रेंडनुसार पठाणने बुधवारीही दुहेरी अंकात कमाई करून इतिहास रचला आहे.

पठाणने आठ दिवसांत किती कमाई केली?

बॉक्स ऑफिसवरआठव्या दिवशीही शाहरुखच्या ‘पठाण’चा दबदबा दिसला. बॉक्स ऑफिस इंडियाच्या रिपोर्टनुसार, सुरुवातीच्या अंदाजानुसार पहिल्या बुधवारी सिनेमाने सुमारे १७ ते १७.५० कोटींची कमाई केली आहे. मंगळवारच्या तुलनेत हा आकडा २० टक्क्यांनी कमी असला तरी इतर सिनेमांच्या कलेक्शनच्या तुलनेत हा आकडा प्रचंड जास्त आहे. अशाप्रकारे, सिनेमाच्या एकूण कलेक्शनबद्दल बोलायचे झाल्यास, ‘पठाण’ने देशभरात ३३३.५५ कोटींची कमाई केली आहे.

जगभरात ६३४ कोटींची कमाई

या आकड्यानुसार आता पहिल्या आठवड्यापर्यंत सिनेमाची कमाई पाहिली तर ती ३४७ कोटींच्या आसपास असू शकते, जी सकारात्मकच आहे. आता ‘पठाण’ ला दुसऱ्या आठवड्याचा म्हणजेच शुक्रवार, शनिवार आणि रविवारचा मोठा फायदा मिळेल अशी अपेक्षा आहे. २५० कोटींच्या बजेटमध्ये तयार झालेल्या या सिनेमाने सातव्या दिवसापर्यंत जगभरात ६३४ कोटींची कमाई केली.

‘दंगल’सिनेमाच्या अजूनही मागेच

पठाण सिनेमाने पहिल्या आठवड्याच्या कमाईच्या बाबतीत जरी विक्रम केला असला तरी तो आमिर खानच्या ‘दंगल’च्या मागेच आहे. दंगल सिनेमाने ३७४ कोटींची कमाई केली होती आणि ‘पठाण’ला या स्थानावर पोहोचण्यासाठी शनिवार किंवा रविवारपर्यंतचा वेळ लागू शकतो.