लॉकडाऊनमध्ये लुडो खेळताना मिळाला आयुष्यभराचा जोडीदार; वनिता खरात-सुमितची हटके लव्ह स्टोरी

मुंबई: ‘महाराष्ट्राची हास्यजत्रा’ फेम अभिनेत्री वनिता खरात ०२ फेब्रुवारी रोजी विवाहबंधनात अडकणार आहे. अभिनेत्रीच्या मेहंदी आणि हळद या समारंभांचे फोटो सोशल मीडियाद्वारे समोर आले असले तरी अद्याप लग्नसोहळ्यातील फोटो सोशल मीडियावर आलेले नाहीत. चाहते अद्यापही या फोटोंच्या प्रतीक्षेत आहेत. वनिता तिचा बॉयफ्रेंड सुमित लोंढेसोबत विवाहबंधनात अडकणार आहे. सुमित-वनिताच्या लग्नसोहळ्याचे फोटो समोर येण्याआधी जाणून घेऊय त्यांची हटके ‘लुडो लव्ह स्टोरी’!

लुडो खेळखा खेळता जडलं प्रेम

वनिता आणि सुमित यांचे लग्न ठरल्यापासून त्यांची विशेष चर्चा होते आहे. अनेक युट्यूब चॅनेल्ससोबतही या दोघांनी लग्नाआधी गप्पा मारल्या. दरम्यान एका मुलाखतीमध्ये सुमित-वनिता यांनी त्यांची हटके लव्ह स्टोरी सांगितली. चक्क लुडो खेळता खेळता या दोघांची लव्ह स्टोरी सुरू झाल्याचं त्यांनी सांगितलं. वनिता-सुमितने सांगितल्याप्रमाणे ते दोघे आधीपासून मित्र होते.

वनिता पुढे असं म्हणाली की लॉकडाऊनमध्ये ज्याप्रमाणे सर्वजण लुडो हा खेळ ऑनलाइन खेळत होते, तसंच त्यांच्या मित्रमैत्रिणींचा ग्रुपही हा खेळ खेळायचा. दिवसभर सर्वांचा लुडो खेळून झाल्यानंतर हे दोघे आणखी काही वेळ लुडो खेळायचे. लॉकडाऊन संपल्यानंतर त्यांची भेट झाली. वनिताने सांगितले की त्यानंतर ते एका ठिकाणी पिकनिकला गेलेले, तेव्हा त्यांच्यात आणखी छान मैत्री झाली. वनिता पुढे म्हणाली की तिला अफेअर-रिलेशनशिप या गोष्टींसाठी वेळ नव्हता, थेट लग्नासाठी तिची तयारी होती. गेल्या जानेवारीमध्ये घरी सर्वांशी बोलणी झाली आणि आता या वर्षीच्या सुरुवातीला ही जोडी लग्न करत आहे.

हे वाचा-आयुष्यात कधीही लग्न करू नका… सिद्धार्थ जाधवने शेअर केलेला Video चर्चेत

सुमितने सांगितले की तो आधी इव्हेंट आयोजित करण्याचे काम करायचा, त्या ग्रुपमधील एका मैत्रिणीची वनिता मैत्रिण होती. तेव्हा त्यांची एकमेकांशी ओळख झाली होती. पण खऱ्या अर्थाने लॉकडाऊनमध्ये बोलणं वाढलं. तेव्हा भेट झाली नव्हती पण बोलणं खूप व्हायचं.

लिपलॉक फोटोशूटमुळे झालेली चर्चा

वनिता आणि सुमित यांच्या मेहंदी-हळदीचे फोटो समोर येण्यापूर्वी त्यांचे प्रीवेडिंग शूट चर्चेत आले होते. यामध्ये पहिल्यांदाच वनिताचा रोमँटिक अंदाज पाहायला मिळाला. या फोटोशूटमध्ये सर्वाधिक चर्चा झाली ते सुमित-वनिताच्या लिपलॉक फोटोची. या प्रीवेडिंग फोटोशूटच्या सीरिजमधील वनिताने शेअर केलेला पहिलाच फोटो त्यांनी केलेल्या किसचा होता. या फोटोने अनेकांचे लक्ष वेधून घेतले.

हे वाचा-तुला आदरांजली वाहावी लागेल असं… काँग्रेस युवा नेत्याच्या निधनाने खचले किरण माने

वनिताचे प्रीवेडिंग फोटोशूटच्या सीरिजमधील सर्वच फोटो अत्यंत रोमँटिक असून त्यावर अभिनेत्रीने दिलेलं मराठी कॅप्शनही लक्षवेधी ठरलं. लिपलॉक फोटोसाठी तिने असे कॅप्शन दिलेले की, ‘गुपित मौनांचे नजरेस कळावे, ओठांचे मग चुंबन व्हावे’, तर आणखी एका फोटोला अभिनेत्रीने ‘बांध फुटावा प्रेमाचा, नजरांचा ही मग डोह व्हावा, मोगऱ्याच्या फुलांचा, चाफ्याला ही मोह व्हावा’, असे कॅप्शन दिलेले. सर्वच फोटोंना तिने असे हटके कॅप्शन दिलेत. आता वनिताचे चाहते लग्नाच्या फोटोंच्या प्रतीक्षेत आहेत.