हायलाइट्स:
- विमानतळावरील फलकावरून शिवसेना खासदार अदानींवर संतापले आहेत.
- अदानीने आपल्या कर्मचाऱ्यांना दिलेल्या टी-शर्टवर अदानी विमानतळ असे लिहिले आहे- अरविंद सावंत
- सांगूनही दुर्लक्ष केले जाते तेव्हा मग अशा प्रकारच्या प्रतिक्रिया उमटतात- अरविंद सावंत
मुंबई: मुंबई विमानतळाचे व्यवस्थापन ताब्यात घेतल्यानंतर अदानी समूहाने विमानतळाबाहेर कंपनीचे नामफलक उभारले होते. हे नामफलक संतप्त शिवसैनिकांनी आज तोडून टाकले. असा फलक लावून अदानी यांनी छत्रपती शिवाजी महाराज यांचा अपमान केल्याचे शिवसैनिकांचे म्हणणे आहे. यानंतर हा मुद्दा आणखी तापत चालला असून आता शिवसेनेचे खासदार अरविंद सावंत यांनी या तोडफोडीचे समर्थन करत अदानींवर संताप व्यक्त केला आहे.
एका वृत्तवाहिनीशी बोलताना खासदार सावंत यांनी आपला संताप व्यक्त केला आहे. अदानीने आपल्या कर्मचाऱ्यांना टी-शर्ट दिले असून या टी-शर्टवर अदानी विमानतळ असे लिहिले आहे. आणि दुर्बिणीने पाहावे लागावे इतके छोटे छत्रपती शिवाजी महाराजांचे नाव टी-शर्टच्या बाह्यांवर लिहिले आहे. हा महाराजांचा अपमान आहे. सांगितल्यानंतरही जेव्हा दुर्लक्ष केले जाते तेव्हा मग अशा प्रकारच्या प्रतिक्रिया उमटतात, असे सांगतानाच ते काय अदानी विमानतळ आहे का?… या आधी ज्यांच्या हाती विमानतळाचे व्यवस्थापन होते तेव्हा त्यांनी असे फलक लावले होते का?, असे प्रश्न खासदार अरविंद सावंत यांनी विचारले आहेत.
क्लिक करा आणि वाचा- मुंबई विमानतळावर ‘अदानी एअरपोर्ट’चा फलक; संतप्त शिवसैनिकांनी केली तोडफोड
छत्रपती शिवाजी महाराज आंतरराष्ट्रीय विमानतळाच्या व्हीआयपी गेट नंबर ८ वरील आणि विलेपार्ले हायवेवरील छत्रपती शिवाजी महाराजांच्या स्मारकासमोरील फलक आज शिवसैनिकांनी लाठ्यांनी तोडून टाकला. मुंबईतील हे विमानतळ छत्रपती शिवाजी महाराजांच्या नावाचे आहे. मात्र, असे असतानाही येथे अदानी विमानतळ असे लावलेले बोर्ड लावण्यात आले. हे अजिबातच सहन केले जाणार नाहीत, असे संतप्त शिवसैनिकांचे म्हणणे आहे. ज्या प्रमाणे या अगोदर येथे जिव्हीकेने आपल्या नावाचा बोर्ड लावला होता, त्याच पद्धतीने अदानीने ‘मॅनेज्ड बाय अदानी एयरपोर्ट’ असा बोर्ड ठेवावा. जर तसे दिसले नाही, तर मात्र जिथे फलक दिसेल, तिथे तोडफोड करणार, असा स्पष्ट ईशाराच शिवसैनिकांनी दिला आहे.
क्लिक करा आणि वाचा- दुकानांच्या वेळांबाबत ठाकरे सरकारचा मोठा निर्णय; आज अध्यादेश निघणार
छत्रपती शिवाजी महाराज आंतरराष्ट्रीय विमानतळाबाहेर अदानींचा फलक लागल्यानंतर शिवसेनेने त्यावर आक्षेप नोंदवला होता. त्यावर शिवसेनेचे प्रवक्ते आण खासदार संजय राऊत यांनी देखील प्रतिक्रिया व्यक्त केली होती. मुंबईचे विमानतळ हे छत्रपती शिवाजी महाराज आंतरराष्ट्रीय विमानतळच आहे. शिवसेनेने त्यासाठी आंदोलन केले होते. असे असताना जर हे विमानतळ कोण्या उद्योगपतीच्या नावाने ओळखले जात असेल तर ते आम्हाला मान्य होणार नाही. हे विमानतळ महाराजांच्याच नावाने ओळखले गेले पाहिजे, असे संजय राऊत यांनी म्हटले होते.
क्लिक करा आणि वाचा- …तोपर्यंत करोनापासून कुणीही सुरक्षित असणार नाही; आदित्य ठाकरे यांनी केलं सावध