लखपती ते कोट्यधीश, विधानपरिषदेच्या आमदारांची संपत्ती किती? सर्वाधिक संपत्ती कुणाकडे?

मुंबई : महाराष्ट्रात नुकत्याच नागपूर,औरंगाबाद, कोकण शिक्षक आणि नाशिक, अमरावती पदवीधर मतदारसंघाच्या निवडणुका पार पडल्या. नागपूरमध्ये सुधाकर अडबाले, औरंगाबादमध्ये विक्रम काळे, कोकण शिक्षकमध्ये ज्ञानेश्वर म्हात्रे, नाशिकमध्ये सत्यजीत तांबे, अमरावतीत धीरज लिंगाडे विजयी झाले. विधानपरिषदेच्या नवनिर्वाचित आमदारांच्या संपत्तीचा आढावा घेण्याचा प्रयत्न करण्यात आला आहे. विजयी उमेदवारांनी निवडणूक आयोगाकडे दिलेल्या शपथपत्रातील आकडेवारीवरुन कुणाकडे किती संपत्ती आहे समजून येतं.

कोकण शिक्षकच्या आमदारांची वैयक्तिक संपत्ती किती?

ज्ञानेश्वर म्हात्रे यांनी त्यांच्या शपथपत्रात २०२१-२२ आर्थिक उत्पन्न १३ लाख ३६ हजार ७८१ रुपये उत्पन्न दाखवलं आहे. त्यांच्याकडे टोयोटा, इनोव्हा क्रीस्टा, टीव्हीएस स्कुटी ही वाहनं आहेत. याशिवाय त्यांच्याकडे ५ तोळे सोने आहे. जंगम मालमतेत्त म्हात्रे यांच्याकडे बँकांमधील ठेवी, विमा पॉलिसी, दागिने, वाहने, हातातील रोख रक्कम मिळून १ कोटी १४ लाख १४ हजार ८८१ रुपयांची संपत्ती आहे. तर स्थावर मालमत्तेच्या ठिकाणी निरंक असा उल्लेख करण्यात आला आहे. तर, ज्ञानेश्वर म्हात्रे यांच्यावर १४ लाख ६५ हजार ९१८ रुपयांचं वाहन कर्ज आहे.

नागपूर शिक्षक आमदारांची वैयक्तिक संपत्ती किती

सुधाकर अडबाले यांनी २०२१-२२ मध्ये आयकर विवरणपत्रात दाखवलेलं वैयक्तिक उत्पन्न ४ लाख ७९ हजार ४७२ रुपये आहे. सुधाकर अडबाले यांच्याकडे हातातील रोख रक्कम १ लाख ५ हजार ३४१ रुपये यासह बँकांमधील ठेवी, विमा पॉलिसी, दागिने, वाहने यांच्यासह जंगम मालमत्तेचं एकूण मूल्य ४३ लाख १५ हजार ८३० रुपयांची आहे. अडबाले यांच्याकडे इको कार, बोलेरो पिकअप, आय ट्वेन्टी स्पोर्ट, टीव्हीएस ज्युपिटर स्कुटर ही वाहनं आहेत. त्यांच्याकडे साडे सात तोळे सोने आहे. अडबाले यांच्याकडील शेती आणि इतर यासह स्थावर मालमत्तेचं मूल्य १ कोटी ७६ हजार ६९४ रुपये इतकं आहे. तर, अडबाले यांच्या नावावर कर्ज नाही.

अमरावती पदवीधरच्या आमदारांची वैयक्तिक संपत्ती किती?

अमरावती पदवीधरचे आमदार धीरज लिंगाडे यांनी आयकर विवरण पत्रात २०२१-२२ मध्ये ९४ लाख ४० हजार ८३० इतकं उत्पन्न दाखवलं आहे. हातातील रोख रक्कम , विमा, बँकांमधील ठेवी, वाहने, सोने, यासंह एकूण जंगम संपत्तीचं मूल्य ३ कोटी ६२ लाख ८८ हजार १५० रुपये आहे. त्यांच्याकडे इनोव्हा क्रिस्टा, अल्टीस, आय ट्वेन्टी, बेंन्झ ही वाहनं आहेत. धीरज लिंगाडे यांच्याकडे १२.५ तोळे सोने आहे. धीरज लिंगाडे यांच्यावर विविध वित्तीय संस्थांकडून घेतलेलं कर्ज १ कोटी ७४ लाख ४५ हजार ७५५ रुपये आहे. शेती, प्लॉट आणि फ्लॅट या स्थावर मालमत्तेचं बाजारमूल्य ८ कोटी ५१ लाख २३ हजार ९०७ रुपये आहे.

औरंगाबाद शिक्षकच्या आमदारांची वैयक्तिक संपत्ती किती?

विक्रम काळे राष्ट्रवादी काँग्रेसकडून चौथ्यांदा या मतदारसंघातून विजयी झाले आहेत. विक्रम काळे यांनी २०२१- २२ च्या आयकरण विवरण पत्रात केलेल्या उल्लेखानुसार त्यांचं उत्पन्न ३१ लाख २ हजार ५९० रुपये आहे. हातातील रोख रक्कम ४ लाख बँकांमधील ठेवी, शेअर्स, विमा पॉलिसी, सोने यासह त्यांची जंगम मालमत्ता २ कोटी ४१ लाख ६८ हजार ९७७ रुपये इतकी आहे. विक्रम काळे यांच्याकडे ८ तोळे सोनं आहे. विक्रम काळे यांच्याकडील स्थावर मालमत्तेचं मूल्य ८ कोटी २२ लाख ६७ हजार ५०० रुपये इतकं आहे. विक्रम काळे यांच्यावर ६० लाख ५३ हजार २६० रुपयांचं कर्ज आहे.

पहिल्या कसोटीसाठी राहुल द्रविड यांचा मास्टर प्लॅन, भारताच्या विजयासाठी शोधला रामबाण उपाय

नाशिक पदवीधरच्या आमदारांची वैयक्तिक संपत्ती किती?

सत्यजीत तांबे यांनी नाशिक पदवीधर मतदारसंघातून विजय मिळवला. तांबे यांनी २०२१-२२ च्या आयकर विवरणपत्रात उत्पन्न ४९ लाख १८ हजार ७७० रुपये दाखवलं आहे. हातातील रोख रक्कम, बँकांमधील ठेवी, शेअर मार्केट, म्युच्युअल फंडातील गुंतवणूक, वाहनं, विमा पॉलिसी, मिळून जंगम संपत्ती ८ कोटी ३४ लाख २१ हजार ४६९ रुपये आहे. तर शेत जमीन, निवासी इमारत आणि इतर मिळून स्थावर मालमत्ता १ कोटी ९७ लाख ६३ हजार ८९२ रुपये इतक्या किमतीची आहे. तर, तांबे यांच्यावर एकूण ६ कोटी ९३ लाख ७ हजार १७० रुपयांचं कर्ज आहे. सत्यजीत तांबे यांच्याकडे ६० तोळं सोने आहे. तर, त्यांच्या स्वत:च्या नावावर वाहनाची नोंद नाही.

काँग्रेसला सोयीनुसार वापरण्यापेक्षा…; पक्षांतर्गत संघर्षाने व्यथित थोरातांना विखेंनी डिवचले, केला थेट सवाल

सदरची आकडेवारी विधानपरिषद निवडणुकीसाठी उमेदवारांनी निवडणूक आयोगात दाखल केलेल्या शपथपत्रातून घेण्यात आलेली आहे. अधिक माहितीसाठी निवडणूक आयोगाच्या वेबसाइटवर उमेदवारांची प्रतिज्ञापत्र पाहायला उपलब्ध आहेत.

फॉर्म अन् कागदपत्रं तयार, भाजप टिळकांना उमेदवारी द्यायला तयार, पण एक अट: चंद्रशेखर बावनकुळे