ट्रकला वेल्डिंग करण्यापूर्वी ट्रकच्या बॅटरीची वायर काढण्याचा वेल्डिंग काम करणाऱ्याला विसर पडला. त्यामुळे वेल्डिंग वायरचा विद्युत प्रवाह आणि बॅटरीच्या वायरमधील प्रवाहाने शॉर्टसर्किट होऊन अचानक आगीचा मोठा भडका उडाला. या आगीत ट्रकने पेट घेतल्याने परिसरात मोठी खळबळ उडाली. या घटनेची माहिती मिळताच अग्निशमन दलाच्या जवानांनी तत्काळ घटनास्थळी दाखल होत आग विझवली.
घटनेत वेल्डिंग काम करणाऱ्याच्या हाता पायाला भाजून गंभीर दुखापत झाली. त्याला उपचारासाठी रुग्णालयात दाखल करण्यात आलं असून पुन्हा एका आगीच्या घटनेने नाशिकमध्ये खळबळ उडाली आहे.
हेही वाचा – नाशिकमध्ये होणार नेपाळच्या चलनी नोटांची छपाई; तब्बल ७३० दशलक्ष नोटा छापणार
नाशिकमध्ये चालत्या वाहनांना आग लागल्याच्या घटना अनेकदा समोर आल्या आहेत. अनेक भीषण अग्नितांडव पाहायला मिळालं आहे. तशीच ही घटना असून यात चालत्या ट्रकला नाही तर वेल्डिंग काम सुरू असताना ही घटना घडली आहे. मात्र या घटनेत ट्रक जाळून खाक झाला असून वेल्डिंग करणारा देखील गंभीररित्या जखमी झाला आहे.
हेही वाचा – भूताळीन म्हणून हिणवलं, गावकऱ्यांकडून जगणं मुश्कील; नाशिकमधील ‘त्या’ महिलेला अखेर मिळाला न्याय
वेल्डिंगचं काम सुरु असताना अचानक आगीचा मोठा भडका उडाल्यामुळे आजूबाजूला असणारे नागरिक भयभीत झाले होते. आग रौद्ररूप धारण करत होती. मात्र तात्काळ अग्निशमन दलाने धाव घेत आग आटोक्यात आणण्याचा प्रयत्न केला आणि काही वेळेनंतर आग आटोक्यात आणण्यास अग्निशमन दलाला यश आलं. मात्र या घटनेमुळे वाहनांचं, इतर कोणत्याही ठिकाणी वेल्डिंग काम किंवा आगीशी संबधित कोणतंही काम करताना काळजी घेणं किती महत्वाचं आहे, हे लक्षात येतं.
नाशिक जिल्ह्यात वाहनांना आग लागल्याच्या अनेक घटना समोर आल्या आहेत. अचानक चालत्या वाहनांना आग लागल्याचे प्रमाण सर्वत्रच वाढताना दिसून येत असून वाहन चालवताना किंवा अगदी इतरही वेळी जपून वापरणं किंवा असं काही होऊ नये याची काळजी घेणं आवश्यक आहे.