सिद्धार्थ आणि कियारा यांचं सूर्यगढ पॅलेसमध्ये थाटामाटात लग्न झालं. त्या दोघांचे लग्नसोहळ्यातील फोटो पाहून त्यांचे चाहते खूपच आनंदित झाले आहेत. चाहत्यांना या दोघांना लग्नानंतर एकत्र पाहण्याची उत्सुकता होती. हा क्षण देखील लवकरच आला. लग्नानंतर कियारा आणि सिद्धार्थचे जैसलमेर विमानतळावरून दिल्लीसाठी रवाना होण्याआधीचे काही व्हिडिओ, फोटो सोशल मीडियावर व्हायरल झाले आहेत.
सोशल मीडियावर व्हायरल झालेल्या व्हिडिओमध्ये कियाराच्या चेहऱ्यावर नवधूचं तेज स्पष्ट दिसत होतं. तिच्या हातामध्ये गुलाबी रंगाचा चुडा, गळ्यात मंगळसुत्र आणि भांगेत कुंकू होतं. कियारा साडी अथवा सलवार कमीज ऐवजी काळ्या रंगाचा टॉप आणि पायजमा अशा वेशभूषेत दिसल्यानं अनेकांनी आश्चर्य व्यक्त केलं. सिद्धार्थदेखील खूप देखणा दिसत होता. त्याच्या चेहऱ्यावर लग्नानंतरचा आनंद दिसून येत होता.
दिल्लीत होणार रिसेप्शन
जैसलमेर इथल्या सूर्यगढ पॅलेसमध्ये लग्नसोहळा झाल्यानंतर आता दिल्लीमध्ये सिद्धार्थ आणि कियाराच्या लग्नाचं ग्रँड रिसेप्शन होणार आहे. सिद्धार्थचे आई-वडिल दिल्लीला राहतात. त्यामुळे ९ फेब्रुवारी रोजी दिल्लीत रिसेप्शन होणार आहे. त्यानंतर हे नवदांपत्य त्यांच्या मित्रमंडळींसाठी मुंबईतही रिसेप्शन ठेवणार आहेत. रिपोर्ट्सनुसार कियारा आणि सिद्धार्थच्या लग्नाचं रिसेप्शन १२ फेब्रुवारी रोजी मुंबईत होणार आहे.
सिद्धार्थ आणि कियाराची लव्हस्टोरी २०२१ मध्ये सुरू झली होती. दोघांची जोडी ‘शेरशाह’ सिनेमात दिसली. ऑनस्क्रीन ही जोडी प्रेक्षकांना खूप आवडली. त्यानंतर या दोघांच्या अफेअरची चर्चा रंगली. अर्थात दोघांनी त्यांच्या नात्याबद्दल कधीही जाहीर भाष्य केलं नाही. परंतु त्यांच्या काही तरी सुरू असल्याची कुणकुण सगळ्यांनाच लागली होती.