Authored by सरफराज सनदी | Edited by रोहित धामणस्कर | महाराष्ट्र टाइम्स.कॉम | Updated: 8 Feb 2023, 9:08 pm
ambergris whale vomit | सांगली पोलिसांनी केलेल्या कारवाईत त्यांच्या हाती समुद्रातील तरंगत सोनं पोलिसांच्या हाती लागलं आहे. सिंधुदुर्गातून दोन जण बॉक्समधून साठा घेऊन सांगलीत आले होते.
हायलाइट्स:
- पावणेसहा कोटींची व्हेल माशाची उलटी जप्त
- तस्करी करणाऱ्या दोघांना अटक
आंतरराष्ट्रीय बाजारपेठेमध्ये व्हेलच्या उलटीच्या या साठ्याची किंमत सुमारे पाच कोटी ७१ लाख इतकी आहे. हा पदार्थ जप्त करत या प्रकरणी सांगलीत राहणाऱ्या सलीम पटेल त्याचबरोबर सिंधुदुर्गहून उलटी पदार्थ विक्री करण्यासाठी आलेल्या अकबर शेख या दोघांना अटक करण्यात आली आहे,अशी माहिती कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी दिली आहे. तसेच सांगली शहर पोलीस ठाण्यामध्ये दोघांच्या विरोधात गुन्हा दाखल झाला असून अधिक तपास शहर पोलीस करत आहेत.
काही दिवसांपूर्वी कोल्हापूरच्या सरनोबत वाडी परिसरातही पोलिसांनी व्हेल माशाची उलटी जप्त केली होती. या मुद्देमालाची किंमत साधारण साडेतीन कोटी इतकी होती. गेल्या काही वर्षांमध्ये व्हेल माशाच्या उलटीची मागणी प्रचंड वाढली आहे. त्यामुळे व्हेल माशाच्या उलटीची मोठ्याप्रमाणावर तस्करी होते. व्हेल माशाच्या उलटीला शास्त्रीय भाषेत एम्बरग्रीस म्हणतात. हा पदार्थ व्हेल माशाच्या आतड्यांमध्ये असतो. व्हेल मासा अपचन झाल्यानंतर अनेकदा समुद्रात अशाप्रकारची उलटी करतो. समुद्रातील खारे पाणी आणि सूर्यप्रकाशाच्या संपर्कात आल्यामुळे या उलटीचा चिकट पदार्थ तयार होतो, त्याला एम्बरग्रीस असे म्हणतात. सुगंधी द्रव्ये तयार करण्यात एम्बरग्रीस वापरले जाते. याशिवाय, एम्बरग्रीसमध्ये अनेक औषधी गुणधर्म असल्याचेही सांगितले जाते. त्यामुळे आंतरराष्ट्रीय बाजारपेठेत व्हेलची उलटी अर्थात एम्बरग्रीसला प्रचंड मागणी आहे. व्हेल मासे खोल समुद्रात असल्याने हा पदार्थ क्वचितच उपलब्ध होतो. त्यामुळे अनेक बड्या कंपन्या आणि व्यावसायिक भलीमोठी किंमत मोजून एम्बरग्रीस खरेदी करतात.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.