बुलढाणा जिल्ह्यातील हिवरा आश्रम येथील बस स्टॉप समोर झालेल्या भीषण अपघातात एका विद्यार्थ्याचा मृत्यू झाला तर दुसरा विद्यार्थी हा गंभीर जखमी झाला असून त्याच्यावर उपचार सुरू आहेत. करण पांडुरंग खडसे हा छगनराव भुजबळ कला व वाणिज्य महाविद्यालयाचा विद्यार्थी वय वर्ष २१ राहणार हिवरा आश्रम त्याची दुचाकी क्रमांक एम एच २१ बी एल ५९३५ ने १० फेब्रुवारी रोजी दुपारी आपल्या घराकडे जात असताना त्याची गाडी स्लीप झाली. त्यावेळी चिखलीकडून भरधाव वेगाने येत असलेल्या टेम्पो क्रमांक एमपी ६८ जी ०५५८ ने धडक देऊन. त्याला गंभीर जखमी केले. त्याच अवस्थेत त्याला प्रथम मेहकर व नंतर औरंगाबाद येथे नेत असताना रस्त्यातच त्याची प्राणज्योत मालवली.
तर दुसरा विद्यार्थी विवेकानंद विद्यामंदिर वर्ग दहावी मध्ये शिकत असलेला शुभम संतोष गिरी हा शाळा सुटल्यानंतर सायकलने घरी जात असताना याच टेम्पोने त्याला देखील कट मारला. या अपघातात तो खाली कोसळून त्याच्या तोंडाला जबर मार लागला असून त्याच्यावर हिवरा आश्रम येथे उपचार सुरू आहेत. या अपघातात मृत पावलेल्या करण खडसे यांच्या मृत्यूने परिसरात संताप व्यक्त होत आहे. या मार्गावरील भरधाव वाहनांचा प्रश्न यानिमित्ताने ऐरणीवर आला असून. हिवरा आश्रम येथे चार ते पाच ठिकाणी तातडीने गतिरोधक बसवण्याची मागणी जोर धरत आहे. चिखली मेहकर रस्ता जेव्हापासून चांगला झाला तेव्हापासून या मार्गावर वाहनांचा वेग वाढला आहे. हिवरा आश्रम गावातील रस्त्यावरूनही जाताना वाहने वेग कमी करत नाही. अशा प्रकारातून हा अपघात झाल्याचे बोलले जात आहे.