या बाबत एका २५ वर्षीय महिला वकिलाने चतुःश्रृंगी पोलीस ठाण्यात फिर्याद दिली होती. चतुःश्रृंगी पोलिसांनी या विरोधात १) दयानंद इरकल ( रा. वडारवाडी ) राष्ट्रवादी काँग्रेसचे पुणे शहर उपाध्यक्ष २) संध्या इरकल पत्नी, ३) अनोळखी पुरुष आणि स्त्री विरोधात कलम ३५४, ३२३,५०४ अंतर्गत गुन्हा दाखल करण्यात आला आहे.
मिळालेल्या माहितीनुसार, काल १३ फेब्रुवारीच्या सायंकाळी ८ वाजून ४० मिनिटांच्या सुमारास फिर्यादी महिला तिच्या मोपेड गाडीवरून पूना हॉस्पिटलच्या दिशेने जात होती. त्यावेळी पुढे असलेली एम एच 12 डीडब्लू 0001 होंडा सीआरव्ही या चारचाकीला हॉर्न वाजवल्याप्रकरणी गाडीमध्ये बसलेला दयानंद इरकल गाडीतून बाहेर आला आणि महिलेची छाती दाबून तिला शिवीगाळ करत तिला ढकलून दिले.
घडलेल्या या प्रकारामुळे महिलेच्या मनात लज्जा निर्माण झाली. आरोपी दयानंद इकरल याची पत्नी संध्या इरकल हिने फिर्यादी महिलेच्या गालावर, गळ्यावर आणि छातीवर नखांनी बोचकरले, असा पीडित महिलेचा आरोप आहे. त्यासोबत संध्या इरकलने हाताने व चपलेने महिलेला मारहाण केली. त्यासोबत इरकल दाम्पत्यासोबत असणारे महिला आणि पुरुष यांनीही शिविगाळ करत मारहाण केली.
हा सगळा धक्कादायक प्रकार रात्री पूना हॉस्पिटल परिसरात घडला. या घटनेच्या विरोधात वकील महिलेने चतुःश्रृंगी पोलीस ठाण्यात तक्रार दाखल केली. या घटनेबाबत मिळालेल्या माहितीच्या आधारे पोलिसांनी गुन्हा दाखल केला आहे. पोलिसांनी विनयभंगाच्या या घटनेचा अधिक तपास करत आहे.