मुंबई: मुंबई उपनगरातील जोगेश्वरी परिसरात एका केअरटेकरने चोरीच्या उद्देशाने वृद्ध दाम्पत्यावर हल्ला केल्याची घटना घडली होती. यामध्ये वृद्ध व्यक्तीचा मृत्यू झाला असून त्याची पत्नी जखमी झाली होती. या घटनेमुळे जोगेश्वरी परिसरात एकच खळबळ उडाली होती. जोगेश्वरीच्या मेघेवाडी परिसरातील श्री समर्थ सोसायटीमध्ये हा प्रकार घडला होता. याठिकाणी राहणाऱ्या सुधीर कृष्णकुमार चिपळुणकर (वय ७२) आणि सुप्रिया सुधीर चिपळुणकर (वय ६५) यांनी १५ दिवसांपूर्वी एक केअरटेकर कामाला ठेवला होता.
Shraddha Aftab: श्रद्धाचे ३५ तुकडे करणाऱ्या आफताब पुनावाला म्हणतोय, मला आणखी शिकायचंय
या केअरटेकरने सोमवारी संध्याकाळी चोरीच्या उद्देशाने वृद्ध दाम्पत्यावर हल्ला केला होता. पप्पू जालिंदर गवळी (वय २९) असे या हल्लेखोराचे नाव आहे. पप्पूने त्याच्यावरील धारदार शस्त्राने प्रथम सुधीर कृष्णकुमार चिपळुणकर यांच्यावर हल्ला केला. पप्पूने सुधीर चिपळूणकर यांचा गळा चिरल्याने ते जागीच गतप्राण झाले. यानंतर पप्पूने आपला मोर्चा सुप्रिया चिपळुणकर यांच्याकडे वळवला. पप्पूने शस्त्राने त्यांच्यावरही वार केले. परंतु, जखमी अवस्थेमध्येही सुप्रिया चिपळुणकर यांनी प्रसंगावधान राखत घराच्या खिडकीतून भांडी बाहेर फेकली. त्यामुळे सोसायटीमध्ये खेळत असलेल्या मुलांनी चिपळूणकर यांच्या घराकडे लक्ष वेधले गेले. हा प्रकार पाहून सोसायटीमधील काही लोक चिपळूणकर यांच्या घरी धावत गेले. मात्र, तोपर्यंत पप्पू गवळी याने तेथून पळ काढला होता.
लिव्ह इन पार्टनरला संपवलं, बॉडी फ्रिजमध्ये टाकून विवाहबंधनात, पाच वर्षांच्या रिलेशनशीपचा अंत
रक्ताच्या थारोळ्यात पडलेल्या सुधीर चिपळुणकर आणि सुप्रिया चिपळुणकर यांना सोसायटीतील मुलांनी तातडीने नजीकच्या रुग्णालयात दाखल केले. मात्र, डॉक्टरांनी सुधीर चिपळुणकर यांना मृत घोषित केले. सुप्रिया चिपळुणकर यांनाही गंभीर इजा झाली आहे. त्यांच्यावर सध्या नानावटी रुग्णालयात उपचार सुरु आहेत. या प्रकाराची माहिती मिळताच पोलिसांनी घटनास्थळी धाव घेतली होती. त्यानंतर पोलिसांनी वेगाने तपास करत पप्पू गवळीला हुडकून काढण्यासाठी तपास सुरु केला. त्यासाठी पोलिसांनी पाच पथके तयार केली होती. यापैकी एक पथक दादर रेल्वेस्थानकाच्या परिसरात पोहोचले. याठिकाणी पप्पू गवळी हा सिद्धेश्वर एक्सप्रेस पकडून मुंबईतून पळून जाण्याच्या बेतात होता. त्यावेळीच पोलीस उपनिरीक्षक बल्फेवाड, पोलीस हवलदार सुदाम नडगे, अनिल खुले, विजय पाटील आणि प्रविण सैदाणे यांनी पप्पू गवळीला शिताफीने अटक केली. पप्पू गवळी याच्यावर कलम ३०२, कलम ३०७ अंतर्गत गुन्हा दाखल केला होता.