सेबीने कापूस वायद्यांवरील बंदी उठवल्यानंतर मल्टी कमोडिटी एक्सचेंज अर्थात एमसीएक्सवरील कापूस वायदे सुरू झाले. त्याचाही आधार कापसाला मिळाला आहे. आंतरराष्ट्रीय पातळीवर कापसाचे उत्पादन घटल्याने मागणी वाढू लागली, त्यामुळेच आता कापसाची मागणी होऊ लागली. या कारणाने कापसाच्या भावात सुधारणा होऊ लागली आहे. कारण मागील काही दिवसात कापसाच्या भावात घसरण झाली होती. दरम्यान विदर्भातील कापसाची पंढरी समजल्या जाणाऱ्या अकोटच्या कृषी उत्पन्न बाजार समितीत कालच्या तुलनेत आज ७५ रुपयांनी वाढ होऊन हे कापसाचे दर ८ हजार ३०० पासून ८ हजार ४४५ रूपांपर्यंत पोहचले आहेत. येत्या काही दिवसात कापसाच्या दरात आणखी वाढवण्याची शक्यताही जाणकारांनी वर्तवली आहे.
यावर्षी आंतरराष्ट्रीय बाजारात कापसाला असलेली मागणी, बांगलादेशात होत असलेली कापसाची निर्यात, एमसीएक्सवरील कापसाचे वायदे सुरू झाल्याने कापसाला मिळालेला आधार, लोकल बाजारातही कापसाची मागणी अशा अनेक कारणांमुळे कापसाच्या भावात सुधारणा होत आहेत. काल अकोला जिल्ह्यातील अकोटच्या कृषी बाजारात ८ हजार २९५ ते ८ हजार ७७० प्रतिक्विंटल प्रमाणे कापसाला भाव मिळाला होता.
तर आज या दरात काहीशी सुधारणा होऊन ८ हजार ३०० पासून ८ हजार ४४५ रूपांपर्यंत भाव गेले आहेत. तर कापसाची आवकही वाढली असून आज २ हजार ८५५ इतका क्विंटल कापूस खरेदी झालाय. अकोटच्या तुलनेत अकोल्याच्या बाजारात कापसाला कमी भाव होता. ७ हजार ९०० ते ८ हजार ४०० रूपये तर सरासरी भाव ८ हजार १५० रुपये प्रतिक्विंटल प्रमाणे इतका होता.
कापसाच्या वायद्यांना सुरुवात झाली म्हणजे कापसाच्या किमतीत वाढ होणार असा गैरसमज पसरलेला आहे. वायदे बाजारामुळे किमती थेट वाढत किंवा कमी होत नाहीये. पण भविष्यात कापसाचा किमतीचा कल कसा असणार, हे समजण्यास सोपं होतं.
तुरीचा बाजारभाव काय?
तुरीच्या भावात किंचित वाढ झाली आहे. काल अकोटच्या बाजारात तुरीला ७ हजार १०० ते ७ हजार ८६० रूपये इतका भाव होता. तर आज ६ हजार ७०० पासून ७ हजार ९३५ प्रतिक्विंटरप्रमाणे तुरीला भाव मिळाला आहे. दुसरीकडे तुरीची आवकही वाढली असून आज २ हजार ३८० इतकी क्विंटल तूर खरेदी करण्यात आली आहे.
मात्र या तुलनेत अकोल्याच्या कृषी उत्पन्न बाजार समितीमध्ये तुरीला चांगला भाव मिळालाय. ६ हजार पासून ७ हजार ९५० रुपयांपर्यंत प्रतिक्विंटल प्रमाणे आज तुरीला भाव मिळाला असून सरासरी भाव ७ हजार इतका होता. आवक चांगली असून २ हजार ७८७ इतकी क्विंटल तूर खरेदी झाली.