हायलाइट्स:
- लहान भावाच्या डोळ्यात सलत होता मोठा भाऊ
- काटा काढण्यासाठी केलं भयंकर कृत्य
- चंद्रपूरमध्ये नागरिकांमध्ये भीतीचं वातावरण
चंद्रपूर : कुर्‍हाडीने वार करून लहान भावाने मोठ्या भावाची हत्या केल्याची धक्कादायक घटना आज चंद्रपूर जिल्ह्यातील मूल तालुक्‍यातील सिंतळा येथे घडली असून आरोपीला मुल पोलिसांनी अटक केली आहे. घरगुती वादावरून नेहमीच लहान भाऊ आणि मोठ्या भावात भांडण होत होते. पण पुढे हा वाद वाढत गेल्याने हत्येचं धक्कादायक कृत्य समोर आलं आहे.
मिळालेल्या माहितीनुसार, ६० वर्षीय विश्वनाथ वैरागडे हा गुरे चारण्याकरता नेत होता. मात्र, लहान भाऊ सुनील वैरागडे याने गावाजवळ पिंपरी दीक्षित मार्गावर असलेल्या पूलाजवळ विश्वनाथ याच्यावर सुनीलने कुऱ्हाडीने सपासप तीन ते चार वार केले. यात विश्वनाथ जागीच ठार झाला.
या घटनेची माहिती नागरिकांनी पोलीस स्टेशनला दिली. त्यानंतर ठाणेदार सतिशसिंह राजपुत यांच्या मार्गदर्शनात सहाय्यक पोलीस निरीक्षक प्रशांत ठवरे यांनी सहका-यांसह घटनास्थळ व सिंतळा येथे जावुन सुनील वैरागडे याला ताब्यात घेतले. तसेच घटनास्थळाचा पंचनामा करून मृतदेह शवविच्छेदना करता उपजिल्हा रुग्णालय येथे पाठवला.
या घटनेचा पुढील तपास सहाय्यक पोलीस अधिक्षक अनुज तारे यांचे मार्गदर्शनात सहाय्यक पोलीस निरीक्षक प्रशांत ठवरे करीत आहेत. तर या घटनेमुळे संपूर्ण परिसरात खळबळ उडाली असून नागरिकांमध्ये भीतीचं वातावरण आहे.