हायलाइट्स:
- महाविद्यालयीन तरूणीवर अत्याचार केल्याचं प्रकरण
- आरोपीला दहा वर्षे सक्तमजुरी आणि ३१ हजार रुपये दंड
- दंडाची रक्कम पीडित तरुणीला देण्याचे न्यायालयाचे आदेश
कोल्हापूर : महाविद्यालयीन तरूणीवर अत्याचार केल्याप्रकरणी कोल्हापुरातील युवक अरविंद वडर यास अतिरिक्त जिल्हा आणि सत्र न्यायाधीश ए. एस. महात्मे यांनी दहा वर्षे सक्तमजुरी आणि ३१ हजार रुपये दंडाची शिक्षा सुनावली आहे.
कोल्हापुरातील दौलत नगर येथील अरविंद वडर हा आरोपी एका महाविद्यालयीन तरुणीला वारंवार शारीरिक आणि मानसिक त्रास देत होता. चाकूचा दाखवून काठीने मारहाण करत तो तिला धमकावत होता. या अत्याचाराने पीडित तरुणीने महाविद्यालयात जाणे बंद केले.
याबाबत तिच्या नातेवाईकांनी विचारपूस केली असता अरविंद वडर याने अत्याचार केल्याची माहिती समोर आली. ही घटना २०१८ मध्ये घडली होती. त्यामुळे पीडितेच्या आईने वडर याच्याविरोधात राजारामपुरी पोलिसांत तक्रार दिली होती. तत्कालीन पोलीस उपनिरीक्षक जे. आर. चव्हाण यांनी या प्रकरणी तपास करून न्यायालयात दोषारोपपत्र दाखल केले होते.
या खटल्याची सुनावणी अतिरिक्त जिल्हा आणि सत्र न्यायाधीश ए.एस. महात्मे यांच्या न्यायालयात झाली. या प्रकरणी विशेष सरकारी वकील अमिता कुलकर्णी यांनी ९ साक्षीदार तपासले. त्यांचा युक्तिवाद, साक्षीदारांच्या साक्षी, उच्च आणि सर्वोच्च न्यायालयाचे निवाडे ग्राह्य मानून न्यायालयाने आरोपी अरविंद वडर याला १० वर्षे सक्तमजुरी आणि ३१ हजार रुपये दंडाची शिक्षा सुनावली. या दंडाची रक्कम पीडित तरुणीला देण्याचे आदेश न्यायालयाने दिले आहेत.
दरम्यान, या खटल्यात सरकारी वकिलांना अॅड. भारत शिंदे, अॅड महेंद्र चव्हाण, पोलीस नाईक माधवी घोडके, अशोक शिंगे यांनी मदत केली.