४ पैकी ३ जणांना फोनचा ‘दुरावा’ सहन होईना, NoMoPhobia म्हणजे काय?, जाणून घ्या

नवी दिल्ली :Smartphone Addiction : बदलत्या युगात सारंकाही डिजीटल होत आहे. आपण गॅजेट्सवर इतके अवलंबून आहोत, की त्याशिवाय आपली काही कामं होतच नाही. या सर्व गॅजेट्समधलं महत्त्वाचं आणि जवळपास प्रत्येकजण वापरत असलेलं गॅजेट म्हणजे स्मार्टफोन. आजकाल स्मार्टफोन हा लोकांच्या जीवनाचा एक महत्त्वाचा असा अविभाज्य भाग बनला आहे. लोकांना स्मार्टफोनशिवाय जगणं कठीण झाले आहे. त्यामुळे आजकाल लोक कोणत्याही किंमतीवर स्मार्टफोन स्वतःपासून लांब करत नाहीत. आता नुकत्याच झालेल्या एका सर्वेक्षणातही ही गोष्ट सिद्ध झाली आहे. नुकतेच ओप्पो आणि काउंटरपॉईंट या कंपन्यांनी केलेल्या स्मार्टफोनच्या व्यसनासंबधित सर्वेक्षणात हे समोर आले असून या सर्वेक्षणाला ‘नोमोफोबिया’ असे नाव देण्यात आले.सर्वेक्षणानुसार, सुमारे ६५ टक्के वापरकर्ते त्यांच्या स्मार्टफोनशी भावनिकरित्या देखील जोडलेले आहेत. इंटरनेट संपणार तर नाही, फोन हरवणार तर नाही आणि बॅटरी संपणार तर नाही, अशी भीती त्यांना नेहमी वाटत असते. नोमोफोबिया नो मोबाईल फोबियाचा शॉर्टफॉर्म आहे. ही एक प्रकारची भीती आहे ज्यामध्ये लोक घाबरतात की मोबाइल आपल्यापासून दूर गेला तर किंवा तो खराब झाला तर..

अनेकजण फोनच्या खराब बॅटरीमुळे त्रस्त
Oppo आणि Counterpoint च्या या सर्वेक्षणाला १,५००० लोकांनी प्रतिसाद दिला. या सर्वेक्षणात सहभागी झालेल्या ६० टक्के लोकांनी मान्य केले की ते खराब बॅटरीमुळे स्मार्टफोन बदलण्यासाठी तयार आहेत. या सर्वेक्षणाबाबत ओप्पो इंडियाचे एक वरिष्ठ अधिकारी दमयंत सिंग खानोरिया म्हणाले की, या सर्वेक्षणामुळे आम्हाला अधिक चांगली बॅटरी लाइफ असलेले फोन लॉन्च करण्याची प्रेरणा मिळाली आहे.

महिलांपेक्षा पुरुषांना मोबाईलची जास्त काळजी असते
या सर्वेक्षणात असे आढळून आले आहे की, महिलांच्या तुलनेत पुरुषांना मोबाईलची जास्त काळजी वाटते. सर्वेक्षणात सामील असलेल्या ८२ टक्के पुरुषांनी कबूल केले की त्यांना फोनबाबत जास्त टेन्शन आहे, तर ७४ टक्के महिलांनी सांगितले की त्यांना फोनची बॅटरी आणि इंटरनेटची काळजी वाटते. सर्वेक्षणात सहभागी एकूण ९२.५ टक्के लोकांनी सांगितले की ते पॉवर सेव्हिंग मोड वापरतात.

४२ टक्के वापरकर्ते मनोरंजनासाठी फोन वापरतात
सर्वेक्षणात सहभागी झालेल्या ४२ टक्के लोकांनी हे मान्य केले की ते मनोरंजनासाठी त्यांचा फोन वापरतात आणि मनोरंजनाचं त्याचं मुख्य साधण म्हणजे सोशल मीडिया हे आहे. सुमारे ६५ टक्के लोकांनी सांगितले की, त्यांना बॅटरी वाचवण्यासाठी अनेक वेळा फोन वापरणे टाळावे देखील लागते. तर एकंदरीत काय या सर्वेक्षणातून हे समोर आले की, फोन हा अनेकांसाठी फारच महत्त्वाचा झाला आहे.

वाचाः मला नोकरी शोधून दे किंवा एखादा जोक सांग, ChatGPT म्हणजे ॲप्लिकेशन एक आणि फायदे अनेक