मुंबई पोलिस दलामध्ये सुरू असलेल्या भरतीसाठी ५ लाख ८१ हजार उमेदवार नशीब आजमाविण्यासाठी मैदानात उतरले होते. मैदानी चाचणी आणि लेखी परीक्षेचे आव्हान पार केल्यानंतर ७०७६ उमेदवारांची भावी पोलिस म्हणून निवड झाली आहे. अंतिम निवड झाली असली तरी पेपरफुटी, कॉपी, डमी उमेदवार असे आरोप झाल्यामुळे या उमेदवारांची नियुक्ती करण्यापूर्वी त्यांची कागदपत्रे, मैदानी चाचणी आणि लेखी परीक्षेदरम्यानची सीसीटीव्हीची पडताळणी करण्यात येणार असल्याचे पोलिसांनी म्हटले आहे.
मुंबई पोलिस दलामध्ये ७०७६ पदांसाठी भरती प्रक्रिया घेण्यात आली. ३१ जानेवारीपासून या पदांसाठी मुंबईत ठिकठिकाणी असलेल्या मैदानांवर चाचणी घेण्यात आली. ५ लाख ८१ हजार उमेदवारांमधून दोन लाखांपेक्षा अधिक उमेदवार मैदानी चाचणीत यशस्वी झाले. त्यानंतर मात्र उपलब्ध पदे आणि एकूण उमेदवार यांच्यातील संख्येनुसार प्रमाण ठरविण्यात आले. त्यानुसार ८३ हजार ७४३ उमेदवार पात्र ठरले. यापैकी राज्यभरातून ७८ हजार ५२२ उमेदवार रविवारी लेखी परिक्षेला बसले होते.
७ मे रोजी मुंबईतील विविध महाविद्यालय आणि शाळा यांच्यातील २१५ केंद्रांवर कडक पोलिस बंदोबस्तामध्ये लेखी परीक्षा पार पडली. कडक बंदोबस्त असतानाही काही ठिकाणी कॉपीचे प्रकार घडले. ब्ल्यू टूथ, बटन कॅमेरा तसेच इतर इलेकट्रोनिक्स यंत्रांचा यासाठी वापर करण्यात आला. कॉपीचे प्रकार उघडकीस आल्यानंतर पोलिसांनी याप्रकरणी चार पोलिस ठाण्यांत गुन्हे दाखल केले आहेत.
दरम्यान काही संघटनांनी यापेक्षा अधिक उमेदवारांनी कॉपी केल्याचा आरोप केला आहे. लेखी परीक्षा पार पडल्यानंतर १७ मे रोजी या परीक्षेचा निकाल जाहीर करण्यात आला. यामध्ये अंतिम ७०७६ उमेदवारांची निवड करण्यात आली. तसेच काही उमेदवारांना प्रतीक्षा यादीमध्ये ठेवण्यात आले आहे.
… अन्यथा प्रतीक्षा य़ादीतील उमेदवार
निवड झालेल्या उमेदवारांना पोलिस दलामध्ये सामावून घेण्यापूर्वी कागदपत्र पडताळणी, वैद्यकीय तपासणी अहवाल, चारित्र्य पडताळणी, मैदानी चाचणी, लेखी परीक्षा यांच्या गुणपत्रिका या तसेच इतर सर्व बाबींची खात्री करण्यात येणार आहे. यामध्ये काही त्रुटी आढळल्यास प्रतीक्षा यादीमधील उमदेवारांना संधी देण्यात येणार आहे.