‘बाईपण भारी देवा’ या सिनेमाने हटके विषय आणि एकापेक्षा एक सरस कलाकार यामुळे प्रेक्षकांना आपलेसे केले. या सिनेमात रोहिणी हट्टंगडी, वंदना गुप्ते, सुकन्या मोने, सुचित्रा बांदेकर, शिल्पा नवलकर आणि दिप्ती परब अशी स्टार कास्ट आहे. या सहाही अभिनेत्रींचा वेगळा असा प्रेक्षकवर्ग आहे, मालिका आणि सिनेमाविश्व या सहाही जणींनी गाजवलं आहे. परिणामी त्या प्रेक्षकांना विशेषत: महिलावर्गाला थिएटरकडे आकर्षित करुन घेण्यास यशस्वी ठरल्या. या सिनेमाचे दिग्दर्शक केदार शिंदे यांनी १० दिवसात झालेल्या कमाईचा आकडा सोशल मीडियावर शेअर केला असून, प्रेक्षकांचे त्यांनी आभार मानले.
काय म्हणाले केदार शिंदे?
केदार यांनी एकूण १० दिवसात किती कमाई झाली हे सांगण्यासाठी एक इन्स्टा पोस्ट केली आहे. त्यात त्यांनी लिहिले की, ‘नि: शब्द.. काही घटना आयुष्यात घडतात त्या फक्त आनंद व्यक्त करण्यासाठी. हे सगळं अनाकलनीय आहे. त्यावर निर्विवाद वर्चस्व आहे ते मायबाप प्रेक्षकांचं, त्या परमेश्वराचा आशीर्वाद. हा सिनेमा आता आमचा राहिला नाही. तो प्रेक्षकांचा झाला आहे. अनेक विक्रम प्रेक्षकांच्या नावे या सिनेमाने निर्माण करावेत हीच श्री स्वामी समर्थांच्या चरणी प्रार्थना. गणपती बाप्पा मोरया. श्री सिध्दीविनायक.’
किती झाली कमाई
‘बाईपण भारी देवा’ या सिनेमाने १० दिवसात एकूण २६.१९ कोटी कमावले आहेत. पहिल्याच आठवड्यात ही कमाई ०६.१० कोटी होती, मराठी सिनेमासाठी एका दिवसातील ही सर्वोच्च कमाई ठरली आहे. दुसऱ्या आठवड्यात सिनेमाने १३.५० कोटी कमावले, तर १० दिवसात ही कमाई २६ कोटींच्या पार गेली आहे. आज बाराव्या दिवशीही सिनेमागृहात प्रेक्षकांनी तेवढीच गर्दी केली आहे.