काळुबाईचं दर्शन घेऊन माघारी परतत होते, नवरा बायकोवर काळाचा घाला, अपघातात करुण अंत

सातारा : मांढरदेवी येथील काळुबाई देवीचे दर्शन घेऊन आपल्या उंब्रज गावी निघालेल्या दाम्पत्यावर काळाने घाला घातला. वाई-पाचवड रस्त्यालगत पार्किंगला उभा असणाऱ्या ट्रकवर दुचाकी धडकून पती-पत्नी जागीच ठार झाली. सोमनाथ नानासाहेब चव्हाण (वय ४६) रेखा सोमनाथ चव्हाण (वय ४०) रा. लक्ष्मीनगर, उंब्रज, ता. कराड, जि. सातारा अशी त्यांची नावे आहेत. ही घटना आज दुपारी पाचवड बसस्थानकाजवळच घडली. या अपघाताची नोंद भुईंज पोलीस ठाण्यात झाली आहे.

पोलिसांकडून मिळालेल्या माहितीनुसार, मांढरदेवी येथील काळुबाई देवीचे दर्शन घेऊन वाईकडून सातारच्या दिशेने पती-पत्नी दुचाकीवरून (एमएच ५० एस ६३३४) निघाले होते. ते पाचवडनजीक आले असता रस्त्यालगत पार्किंगला उभ्या असणाऱ्या ट्रकला (एमएच १० सीक्यू ६१२९) पाठीमागून जाऊन जोरदार धडक दिली.

या धडकेत पती-पत्नीच्या डोक्याला गंभीर दुखापत झाल्याने ते जागीच ठार झाले. पती-पत्नी हे दोघेही उंब्रज (ता. कराड, जि. सातारा) येथील असल्याची माहिती समोर आली आहे. या घटनेची माहिती मिळताच भुईंज पोलीस ठाण्याचे कर्मचारी दाखल झाले. या घटनेचा त्यांनी पंचनामा करून मृतांच्या नातेवाईकांना याची माहिती दिली.

या घटनेची माहिती मिळताच त्यांचे नातेवाईक काही तासातच घटनास्थळी दाखल झाले. या दोन्ही मृतदेहांचे येथील प्राथमिक आरोग्य केंद्रात शवविच्छेदन करण्यात आले. त्यानंतर मृतदेह नातेवाईकांच्या ताब्यात देण्यात आले. या घटनेचा तपास सहाय्यक पोलीस निरीक्षक रमेश गर्जे यांच्या मार्गदर्शनाखाली भुईंज पोलीस ठाण्याचे कर्मचारी करत आहेत.