ठाण्यातील वागळे इस्टेट परिसरातील रोड क्रमांक १६ येथे दोन जण व्हेल माशाची उलटीच्या विक्रीसाठी येणार असल्याची माहिती श्रीनगर पोलीस ठाण्याचे सहायक पोलीस निरीक्षक शिवराज बेंद्रे यांना मिळाली होती. त्यानुसार बेंद्रे यांच्या पथकाने सापळा रचून मुझमील सुभेदार (४५, रा. श्रीवर्धन, जिल्हा रायगड) आणि शहजाद कादरी (४६, रा. वरवटना , ता. म्हसळा, जिल्हा रायगड) या दोघांना ताब्यात घेतले. त्यांच्याकडील बॅगमध्ये असलेल्या प्लास्टिक पिशवीत पिवळसर तांबट रंगाचा वेगवेगळ्या आकाराचा पदार्थ सापडला.
पोलिसांच्या चौकशीत हा पदार्थ व्हेल माशाची उलटी असल्याचे समोर आले. ही उलटी मध्यस्थीच्या मदतीने तीन कोटी रुपयांना विकणार होतो, अशी कबुली दोघांनी दिली. पोलिसांनी दोघांच्या ताब्यातून व्हेल माशाच्या उलटीसह दोन मोबाईल फोन जप्त केले. या दोघांना न्यायालयाने २६ डिसेंबरपर्यंत पोलीस कोठडी सुनावली आहे.
प्रयोगशाळेत होणार तपासणार
तस्करांकडून ताब्यात घेतलेली व्हेल माशाची उलटी खरी आहे की बनावट याचा छडा लावण्यासाठी ती प्रयोगशाळेत पाठवली जाणार आहे. याठिकाणी तिच्यावर प्रक्रिया करून ही उलटी खरी आहे की बनावट याबाबत माहिती घेतली जाणार आहे. मुख्यतः परफ्युम, उच्च दर्जाचे अत्तर बनवण्यासाठी या उलटीचा वापर होतो. ही उलटी आरोपींनी श्रीवर्धनवरून येथून आणल्याचे प्राथमिक चौकशीत समोर आले असून या अनुषंगाने ठाणे पोलीस श्रीवर्धन येथेही तपास करणार आहेत. तसेच आरोपी ठाण्यात नेमके कोणाला ही उलटी विकण्यासाठी आले होते. त्या टोळीचाही शोध सुरु आहे.
Read Latest Maharashtra News And Marathi News