क्षुल्लक वाद एकमेकांमध्ये होते. मात्र भर दुपारी एका भावाने दुसऱ्या भावावर पाठीमागून सपासप वार करून हत्या केली. घरातील किरकोळ वाद, सतत दारू पिऊन अपमानस्पद बोलून शिवीगाळ करणे या त्रासाला कंटाळून पनवेलमध्ये एकाने व्यक्तीने आपल्या भावाची हत्या केल्याची धक्कादायक घटना घडली असून पनवेल तालुका पोलिसांनी आरोपीला अटक करून ताब्यात घेतले आहे. मिळालेल्या माहितीनुसार, पनवेल तालुका पोलीस हद्दीतील आनंद धनाजी पाटील (३२) आणि भरत पांडुरंग पाटील (४२) हे दोघेही राहणार चिखले तालुकापनवेल मधील आहेत. हे दोघे नात्याने सख्खे चुलत भाऊ असून दोघांमध्ये अनेक वर्षांपासून परिवारातील किरकोळ वाद होता.
यात आनंद पाटील हा भरत यास प्रत्येकवेळी कोणत्या ना कोणत्या कारणाने त्याला अपमानास्पद बोलणे, शिवीगाळ करणे, दारुसाठी पैसे मागणे अशा प्रकारचा त्रास देत होता. मात्र एक दिवस डोक्यात राग धरून दुपारच्या वेळी राकेश गुरव यांच्या डेअरी समोरून भरत हा आपली रिक्षा घेऊन जात असताना आनंद पाटील याने अडवले. भर रस्त्यात भरत पाटीलकडे दारुसाठी पैसे मागितले. अपमानास्पद बोलून शिवीगाळ केल्याने भरत याचा राग अनावर झाला. भरतने घरातील कोयता आणून आनंद पाटील याच्या मानेवर, गळ्यावर, चेहऱ्यावर तसेच हातावर सपासप वार केले. यात आनंद यांचा मृत्यू झाला. याबाबत माहिती मिळताच पोलीस उपायुक्त पंकज डहाने, सहाय्यक आयुक्त अशोक राजपूत पनवेल तालुका पोलीस ठाण्याचे वरिष्ठ पोलीस निरीक्षक अनिल पाटील यांनी ताबडतोब घटनास्थळी धाव घेतली. आरोपी भरत पाटील याला पोलिसांनी अटक केली असून पनवेल तालुका पोलीस पुढील तपास करत आहेत.