राष्ट्रवादी काँग्रेस अजित पवार गटाचा मेळावा रविवारी पिंपरी चिंचवड शहरातील काळेवाडी भागात नुकताच पार पडला. मात्र या मेळाव्याला पार्थ पवार येणार अशी चर्चा असताना पार्थ पवार मात्र आलेच नाहीत. त्यामुळे पार्थ पवार यांचे नक्की चालले काय? अशी चर्चा ऐकायला मिळत आहे.
२०१९ चा निवडणुकीतील पराभवानंतर पार्थ पवार हे मावळ लोकसभामतदार संघात एक दोन कार्यक्रम वगळता फिरकलेच नाहीत. तसेच राष्ट्रवादीच्या युवक मेळाव्याला त्यांनी दांडी मारल्याने कार्यकर्त्यांमध्ये संभ्रम निर्माण झाला आहे. त्यामुळे पार्थ पवार खरंच मावळ लोकसभा लढवणार आहेत का? अशी चर्चा आता सुरू झाली आहे.
पिंपरी चिंचवड हा अजित पवार यांचा बालेकिल्ला म्हणून ओळखला जातो. त्यात त्यांनी मुलाला मावळ लोकसभेसाठी पुन्हा तयारी करण्यास सांगितल्याची चर्चा होती. मात्र पार्थ पवार फारसे ॲक्टिव्ह नसल्याचे काल झालेल्या मेळाव्यातून पुन्हा एकदा समोर आले आहे. अजित पवार यांनी सत्तेत जात आपली भूमिका घेतली. मात्र या भूमिकेला अनेकांनी साथ देत त्यांच्यासोबत जाण्याचा निर्णय घेतला. परंतु पार्थ पवार यांच्या न येण्याने कार्यकर्त्यांत संभ्रम निर्माण झाला असल्याच्या चर्चा होऊ लागल्या आहेत.
या मेळाव्यात युवक पदाधिकाऱ्यांना नियुक्ती पत्रांचे वाटप करण्यात आले. यावेळी अजित पवार गटाचे राष्ट्रवादी युवक काँग्रेसचे प्रदेशाध्यक्ष सुरज चव्हाण, शहराध्यक्ष अजित गव्हाणे, माजी नगरसेवक भाऊसाहेब भोईर, प्रदेश सरचिटणीस विशाल काळभोर यावेळी उपस्थित होते.
Read Latest Maharashtra Updates And Marathi News