शिवतारेंना सांगून पाडलं, आता कोल्हेंनाही चॅलेंज, अजित पवार शिरूरमध्ये दादांना तिकीट देणार?

पुणे : आगामी लोकसभा निवडणुकीमध्ये शिरूर लोकसभा मतदारसंघातून राष्ट्रवादी काँग्रेसचा उमेदवार उभा करू आणि विद्यमान खासदार अमोल कोल्हे यांचा पराभव करू, असं ओपन चॅलेंज राज्याचे उपमुख्यमंत्री अजित पवार यांनी दिलं आहे. मागील विधानसभा निवडणुकीत शिवसेना नेते तथा माजी मंत्री विजय शिवतारे यांच्याविरोधातही असंच चॅलेंज देऊन अजित पवार यांनी शिवतारेंच्या पराभवात मोठा वाटा उचलला होता. त्यामुळे आता डॉ. कोल्हेंना चॅलेंज देऊन अजित पवार ‘पुरंदर’ची पुनरावृत्ती शिरूरमध्ये करणार का? अशा चर्चा राजकीय वर्तुळात सुरू झाल्या आहेत. पण महत्त्वाची गोष्ट म्हणजे अमोल कोल्हे यांच्या पराभवाचा प्रण बोलून दाखविताना अजित पवार यांनी मात्र राष्ट्रवादीकडून (अजित पवार गट) उमेदवार कोण असेल? याबद्दलचं सूतोवाच करणं खुबीने टाळलं.

मी जे बोलतो ते करून दाखवतोच, अमोल कोल्हे कोल्हेंना पाडणारच

मी जे बोलतो ते करून दाखवतोच, हे संपूर्ण महाराष्ट्राला माहिती आहे. त्यामुळे आगामी लोकसभा निवडणुकीमध्ये शिरूर लोकसभा मतदारसंघातून राष्ट्रवादी काँग्रेसचा उमेदवार उभा करून या निवडणुकीत आमचा उमेदवार आम्ही निवडून आणू आणि अमोल कोल्हे यांचा पराभव करू, असं खुलं आव्हान अजित पवार यांनी दिलं.

अजितदादा म्हणाले, लोकसभेत पाडणार म्हणजे पाडणार, अमोल कोल्हे यांनीही शड्डू ठोकला, म्हणाले…
“अमोल कोल्हे यांना तिकीट नाकारण्यात आले होते. त्यांना तिकीट कोणामुळे मिळाले? हे त्यांना विचारा. तसेच निवडून आल्यानंतर दीड महिन्यामध्ये ते राजीनामा द्यायला निघाले होते. गेल्या पाच वर्षात ते मतदारसंघात दिसले नाही. त्यामुळे त्यांचेच मन त्यांना खायला लागले आहे. मात्र, शिरूर लोकसभेमध्ये महायुतीचा उमेदवार उभा करणार आणि तो निवडून आणणार. मी जे बोलतो ते करतोच, अमोल कोल्हे यांचा पराभव करणारच”, असा निर्धार अजित पवार यांनी बोलून दाखवला.

कोल्हेंना पाडायचा निर्धार, अजितदादांचा पठ्ठा सरसावला, म्हणतो, तिकीट द्या-शब्द खरा करून दाखवतो!

आढळराव पाटील अजित पवार गटाकडून लढणार?

भाजपकडून शिरूर लोकसभा मतदारसंघावर वारंवार दावा सांगितला जात असताना शिवसेना शिंदे गटाकडून कोणतीही हालचाल होत नसल्याने शिवसेना नेते तथा शिरूरचे माजी खासदार शिवाजीराव आढळराव पाटील अस्वस्थ आहेत. त्यांच्या मनाची घालमेल होत असून जर लवकर निर्णय झाला नाही तर अजित पवार गटाकडून लोकसभा निवडणूक लढविण्याची त्यांची तयारी असल्याची माहिती ‘मटा’ ला विश्वसनीय सूत्रांनी दिली. तसेच शिवसेना नेतृत्वाकडून लोकसभेचा पक्का शब्दही आढळराव पाटलांना मिळालेला नसल्याने ते राजकीय पर्याय चाचपून पाहू शकतात.

अजित पवार यांनी शिरूर लोकसभेवर ठासून दावा सांगितला आहे. आज तर त्यांनी खासदार कोल्हे यांचा जाहीरपणे पराभव करण्याचा प्रण बोलून दाखवला आहे. शिरूरमध्ये अमोल कोल्हे यांना टक्कर देणारा राष्ट्रवादीकडे सध्या तरी उमेदवार नाहीये. अशा परिस्थितीत शिवाजीराव आढळराव पाटील यांना आपल्याकडे खेचून ही लढत अधिक रंजक करण्याची, प्रसंगी ही जागा आपल्याकडे खेचण्याची अजितदादांची रणनीती असल्याचा कयास राजकीय जाणकार बोलून दाखवत आहेत.

दादांचा कट्टर समर्थक मातोश्रीवर, लोकसभेचं तिकीट मागितलं, ठाकरे म्हणाले, मला २ दिवस द्या!

अजित पवार यांच्या चॅलेंजनंतर आढळरावांनी दादांचं गुणगाण गायलं

अजितदादांनी केलेलं विधान योग्यच आहे. विद्यमान खासदार अमोल कोल्हे पाच वर्षात मतदारसंघात फिरकलेच नाहीत. मात्र, आता निवडणूक आल्यावर आक्रोश यात्रा सुचतेय. पाच वर्षात जनता आक्रोश करत असताना यांना दिसले नाही. राहिला विषय अजितदादांचा तर दादांनी एखादी गोष्ट मनावर घेतली की ती ते करून दाखवतात हे आपणा सर्वांना माहितीये, अशा शब्दात आढळराव पाटील यांनी अजितदादांना साथ दिली आहे.