गेल्या काही महिन्यांपासून चाळीसगाव शहराच्या मध्यवर्ती ठिकाणी असलेल्या एका अनाधिकृत कॅफेमध्ये तरुण तरुणींना अनैतिक कृत्य करण्यासाठी कॅफे मालकाडून जागा उपलब्ध करून दिली जात असल्याची माहिती पोलिसांसह आमदर मंगेश चव्हाण यांना मिळाली होती. या माहितीच्या आधारे पोलिसांच्या पथकासह – आमदार मंगेश चव्हाण यांनी या ठिकाणी जाऊन पाहणी केली असता, अंधारात काही तरुण-तरुणी आढळून आल्याचं दिसून आले. या घटनेनंतर संतप्त झालेल्या आमदार मंगेश चव्हाण यांनी या कॅफेची स्वतःच तोडफोड केल्याने खळबळ उडाली आहे.
चाळीसगाव शहराचे मध्यवर्ती ठिकाणी असलेल्या या कॅफेबाबत मागील वर्षी देखील आपण कॅफे चालकाला समज दिली होती. त्यानंतर काही काळासाठी या ठिकाणी सुरू असलेला हा प्रकार बंद देखील झाला होता. मात्र, गेल्या काही दिवसांपासून या कॅफेमध्ये पुन्हा अनैतिक प्रकार सुरू झाल्याचे माहीत सामोर आल्याने न.पा प्रशासन,पोलीस प्रशासन आणि आपण या ठिकाणी आलो असता या ठिकाणी गैरकृत्य करताना तरुण-तरुणी आढळून आले आहेत, असं मंगेश चव्हाण यांनी म्हटलं आहे.
अशा प्रकारची गैरकृत्य कोणी करत असेल आणि त्याला कोणी जागा उपलब्ध करून देणार असेल तर ते कदापिही खपवून घेतलं जाणार नाही. वेळ पडली तर अशा इमारतीवर बुलडोझर देखील फिरवला जाईल, असा इशारा भाजप आमदार मंगेश चव्हाण यांनी दिला आहे. कॅफे चालकाला पोलिसांनी ताब्यात घेतलं असून त्याची चौकशी केली जात आहे. त्याच्यावर योग्य ती कायदेशीर कारवाई करण्यात येणार आहे, अशी माहिती देखील मंगेश चव्हाण यांनी दिली.