अनुप यांचे मोनेवाडा-बेसा मार्गावर नमन साडी सेंटर आहे. येथे प्रवीण हा लेखापाल आहे. त्याच्याकडे दुकानाचे सर्व आर्थिक व्यवहार आहेत. गुरुवारी अनुप यांना कोटक महिंद्रा बँकेतून फोन आला. तुमचा धनादेश वटवायचा आहे का, अशी विचारणा कर्मचाऱ्याने त्यांना केली. कोणालाही धनोदश दिला नसताना बँकेत वटविण्यासाठी तो कसा आला, असा प्रश्न अनुप यांना पडला. ते लगेच बँकेत गेले. यावेळी बँकेत प्रवीणची मैत्रीण होती. प्रवीणने तिला साडी सेंटरचा १ लाख रुपयांचा धनोदश वटवायला दिला होता. अनुप यांनी तिला विचारणा केली असता प्रवीणने यापूर्वीही अनेकदा धनादेश दिल्याचे तिने सांगितले. अनुप यांनी एक लाखाचा धनादेश वटविला. पैसे स्वत:कडे घेतले. त्यानंतर मैत्रिणीचे बँक स्टेस्टमेंट तपासले असता ३ लाख १० हजार रुपयेही अशाचप्रकारे वटविण्यात आल्याचे स्पष्ट झाले. याप्रकरणी अनुप यांनी दिलेल्या तक्रारीवरून हुडकेश्वर पोलिसांनी प्रवीण आणि त्याच्या मैत्रिणीविरुद्ध गुन्हा दाखल करून तपास सुरू केला आहे.
रोख रकमेसह अडीच लाखांचा ऐवज लंपास
नागपूर : जरीपटका पोलिस ठाण्याच्या हद्दीतील मिसाळ ले-आउट येथे घरफोडी करून चोरट्याने १ लाख ४७ हजारांच्या रोख रकमेसह अडीच लाखांचा ऐवज लंपास केला. सुनील प्रकाश वरशीकर (वय ३७) यांनी दिलेल्या तक्रारीवरुन जरीपटका पोलिसांनी घरफोडीचा गुन्हा दाखल केला. सुनील हे आरोग्य सल्लागार आहेत. २८ डिसेंबरला सुनील हे कुटुंबातील सदस्यांसह तळमजल्यावर झोपले. संधी साधून चोरट्याने पहिल्या माळ्यावरील खोलीतील आलमारीतून रोख व दागिने चोरी केले. सकाळी ही घटना उघडकीस आली. चॅनलला गेटला कुलूप न लावल्याने ही चोरी झाल्याचे सांगण्यात येते.
रेल्वे सुरक्षा दलाच्या जवानाकडे घरफोडी
नागपूर : अजनी रेल्वे सुरक्षा दलातील जवानाकडे घरफोडी करून चोरट्याचे १ लाखाचा ऐवज लंपास केला. ही घटना अजनी पोलिस ठाण्याच्या हद्दीतील पार्वतीनगर येथील दीपक मनोहर पवार (वय ३७) यांच्याकडे घडली.
नाताळची सुटी असल्याने दीपक यांचे कुटूंब आमला येथे राहणाऱ्या नातेवाइकाकडे गेले. दीपक हे घरी होते. गुरुवारी रात्री ते ड्युटीवर गेले असता घरी कुणीही नसल्याची संधी साधून चोरट्याने दरवाजाचे कुलूप तोडले. आलमारीतील सोन्याचे दागिने व रोख चोरी केली. शुक्रवारी सकाळी दीपक हे घरी परतले असता ही घटना उघडकीस आली. त्यांनी दिलेल्या तक्रारीवरून अजनी पोलिसांनी घरफोडीचा गुन्हा दाखल केला.
Read Latest Maharashtra News And Marathi News