अकोल्यात गस्त घालणाऱ्या पोलिसांवर दरोडेखोरांचा हल्ला, अंदाधुंद गोळीबाराने खळबळ

अकोला : गस्तीवर असलेल्या पोलिसांवर अज्ञात दरोडेखोरांनी पोलिसांना चकमा देण्यासाठी हवेत गोळीबार करून पळ काढलाय. अकोला शहर, अकोला जिल्ह्यात घरफोडी, तसेच दरोडा घालण्याचे गुन्हे आटोक्यात यावे, या अनुषंगाने अकोला पोलिसांनी गस्त वाढवली आहे. यावेळी अकोल्यातील उरळ पोलिसांवर गस्तीदरम्यान चार तरुणांनी गोळीबार केला आहे. या गोळीबारात दोन्ही पोलीस कर्मचारी बचावले आहे. हा गोळीबार हवेत केल्याच सांगण्यात येत असून अकोला जिल्ह्यातील मांजरी कंचनपूर रस्त्यावर रात्री पावणे दोन वाजताच्या सुमारास हा प्रकार घडला आहे.

उरळ पोलीस स्टेशनचे पोलीस निरीक्षक गोपाल ढोले यांनी दिलेल्या माहितीनुसार उरळ पोलीस स्टेशन हद्दीत रात्रीच्या सुमारास पेट्रोलिंग वाढवण्यात आली आहे. यामध्ये हातरूण आणि मांजरी भागातही पेट्रालिंग वाढवली आहे. दरम्यान काल रात्री हातरूणचे बीट जमादार दिनकर इंगळे आणि वाहन चालक मूंडे हे चारचाकी पोलीस वाहनात पेट्रोलिंग करत असताना त्यांच्यावर मोटर सायकल स्वार असलेल्या लोकांनी गोळीबार केलाय. या घटनेत दोन्ही पोलीस कर्मचारी बचावले आहे, असे ढोले यांनी कळवले आहे. ते म्हणाले की काल मध्यरात्रीनंतर पावणेदोन वाजताच्या सुमारास पोलीस कर्मचारी दिनकर इंगळे आणि वाहनचालक मुंडे हे मांजरी कंचनपूर रस्त्यावर पेट्रोलिंग करत होते. या दरम्यान कंचनकडून दोन मोटरसायकली येत असताना दिसल्या. तेवढ्यात दोन्ही मोटरसायकलस्वारांनी पोलिसांचं वाहन पाहताच आपल्या दुचाकी वाहन वळवलं आणि पळू लागले. इंगळे यांच्या हे निदर्शनास येतात त्यांनी आपल्याला पाहताच का पळ काढला याचा विचार केला आणि त्यांच्या मागे पाठलाग करू लागले. त्यानंतर समोरून एक ॲम्बुलन्स सायरन वाजवत येत होती, त्यामुळे मोटरसायकल स्वारांना समजलं की आपल्याला दोन्हीकडून पोलिसांनी घेरलं. अखेर पोलिसांच्या तावडीतून सुटण्यासाठी त्यांनी पोलिसांच्या वाहनाच्या दिशेने हवेत गोळीबार केला, आणि मोटरसायकल जोरात पळवली. त्यानंतर पोलिसांनी त्याचा पाठलाग सुरू ठेवला. गोळीबार करणाऱ्यांना पकडण्यासाठी दोन्ही पोलिसांकडून प्रयत्न करण्यात येत होते. परंतु रस्ता खराब असल्यामुळे चारचाकी वाहन चालवण्यात अनेक अडचणीत होत्या. अखेर कंचनपून पर्यंत त्यांचा पाठलाग कायम सुरू ठेवला, नंतर त्यांच्या मोटर सायकली पोलिसांच्या नजरेसमोरून गायब झाली. सुदैवानं उरळ पोलिसांच्या वाहनाचे अंतर दुचाकी पासून शंभर मीटर पेक्षा अधिक असल्याने त्यांच्या बंदुकीचा निशाणा हुकला, अन् दोन्ही पोलीस कर्मचारी बचावले आहेत.

रात्रीच ठिकठिकाणी नाकेबंदी

या घटनेची माहिती कंट्रोल रूमला देताच दहीहंडा आणि इतर पोलिसांनी ठिकठिकाणी रस्त्यावर नाकाबंदी केली. परंतु त्यांचा कुठल्याही प्रकारचा सुगावा लागला नाहीये. या घटने संदर्भात पोलिसांना नोंद करण्यात आली असून हवेत गोळीबार करणाऱ्यांचा म्हणजेच पोलिसांना गोळीबार करणाऱ्यांचा पोलीस शोध घेत आहेत. या घटनेने अकोला पोलीस दलात एकच खळबळ उडाली आहे.

गोळीबार करणारे होते तरी कोण?

दोन मोटरसायकल स्वार होऊन आलेले चौघे जण म्हणजेच पोलिसांवर गोळीबार करणारे नेमके कोण होते? त्यांचा काय उद्देश होता? मांजरीकडे नेमकं कुठे चालले होते? पोलिसांवर हवेत गोळीबार करणारे नेमके खरच दरोडेखोर होते का हाही प्रश्न सध्या उपस्थित केला जातोय. आता अकोला पोलिसांसमोर गोळीबार करणाऱ्यांना पकडण्याच एक मोठ आव्हान उभं ठाकलं आहे.