रणबीर कपूरच्या ‘ॲनिमल’ सिनेमासह विक्की कौशलचा ‘सॅम बहादूर’ सिनेमा क्लॅश झाला. दोन्ही सिनेमे १ डिसेंबरला एकाच दिवशी प्रदर्शित झाले. विक्की कौशलच्या ‘सॅम बहादूर’ सिनेमालाही प्रेक्षकांचा चांगला प्रतिसाद मिळतो आहे. पण रणबीरच्या ‘ॲनिमल’पुढे विक्कीचा ‘सॅम बहादूर’ फिका पडला आहे.
‘सॅम बहादूर’ सिनेमाचं ओपनिंग संथ झालं. सिनेमा प्रदर्शित झाल्याच्या पहिल्याच दिवशी ‘सॅम बहादूर’ दोन आकडी कलेक्शनही करू शकला नाही. बॉक्स ऑफिसवर विक्की कौशलच्या ‘सॅम बहादूर’ सिनेमाने पहिल्या दिवशी ५.५० कोटींचा गल्ला जमवला. ओपनिंगला सिनेमाला फार कमाई करता आली नाही, परंतु वीकेंडला सिनेमा चांगली कमाई करू शकेल असा अंदाज निर्मात्यांनी वर्तवला आहे.
‘ॲनिमल’चं ॲडव्हान्स बुकिंग
‘ॲनिमल’चा ट्रेलर लाँच झाल्यानंतर या सिनेमाची मोठी क्रेझ निर्माण झाली होती. त्यामुळेच सिनेमाचं मोठ्या प्रमाणात ॲडव्हान्स बुकिंग झालं होतं. सिनेमाने ॲडव्हान्स बुकिंगमध्येच ३३ कोटींहून अधिकचं कलेक्शन केलं होतं.
सिनेमा प्रदर्शित झाल्यानंतर पहिल्याच दिवशी ६१ कोटींची कमाई केली. ‘ॲनिमल’ने ‘पठाण’, ‘गदर २’, ‘टायगर ३’ लाही मागे टाकलं. ‘पठाण’ने ५७ कोटी, ‘गदर २’ ने ४०.१० कोटी आणि ‘टायगर ३’ ने ४४.५० कोटी पहिल्या दिवशी कलेक्शन केलं होतं.
‘ॲनिमल’ सिनेमाने पहिल्याच दिवशी हिंदीत ५० कोटी, तेलुगूमध्ये १० कोटी कमावले आहेत. तमिळमध्ये ०.४ कोटी, कन्नडमध्ये ०.०९ कोटी आणि मल्याळममध्ये ०.०१ कोटींचं कलेक्शन केलं आहे.