चॅलेंज दिलं, तयारीला लागले, कोल्हेंना पाडण्यासाठी दादांचा प्लॅन ठरला, लेकालाच रिंगणात उतरवणार?

पुणे : उपमुख्यमंत्री अजित पवार यांनी शिरूर लोकसभा मतदारसंघात विद्यमान खासदार अमोल कोल्हे यांना चॅलेंज दिले आहे. अमोल कोल्हे यांच्या विरोधात आपण उमेदवार देऊ आणि निवडून आणू असं अजित पवार यांनी नि:क्षून सांगितले आहे. त्यानंतर शिरूर लोकसभा मतदारसंघात अजित पवार कोण उमेदवार देणार यावर चर्चा सुरू झाल्या आहेत. अशातच अजित पवार यांचे सुपुत्र पार्थ पवार हे शिरूर लोकसभा मतदारसंघात अॅक्टिव्ह झाल्याचं पाहायला मिळत आहे.

आज शिरूर लोकसभा मतदारसंघात येणाऱ्या हडपसर विधानसभा मतदारसंघात पार्थ पवार यांनी दौरा केला आहे. या दौऱ्यात पार्थ पवार यांनी राष्ट्रवादी काँग्रेसच्या अनेक नगरसेवकांच्या भेटी घेतल्या आहेत. त्याचबरोबर हडपसर विधानसभा मतदारसंघाचे आमदार चेतन तुपे यांच्या निवासस्थानी जाऊन देखील पार्थ पवार यांनी भेट घेतली आहे. त्यामुळे अजित पवार यांनी अमोल कोल्हे यांना चॅलेंज दिल्यानंतर आता पार्थ पवार थेट मैदानात उतरले आहेत.

पार्थ पवार शिरूरमधून नशीब आजमवणार

एकीकडे पार्थ पवार हे राष्ट्रवादी काँग्रेसच्या पक्ष बांधणीला लागल्याचे चित्र असताना दुसरीकडे पार्थ पवार हे स्वतः शिरूर लोकसभा मतदारसंघातून नशीब आजमावणार असल्याच्या चर्चा देखील आहेत.

राष्ट्रवादी शरद पवार गटाचे खासदार अमोल कोल्हे यांना उपमुख्यमंत्री अजित पवार यांनी थेट आव्हान देत शिरूर मध्ये उमेदवार देणार आणि त्याला निवडून आणणार असा इशारा दिला होता. यानंतर आता शिरूर लोकसभा मतदारसंघांमध्ये पार्थ पवार ॲक्टिव्ह झाल्याचं चित्र दिसत आहे. त्यामुळे अमोल कोल्हे यांच्या विरोधात पार्थ पवार शिरूरच्या मैदानात पाहायला मिळणार अशी चर्चा राजकीय वर्तुळात पाहायला मिळत आहे.

अजित पवारांनी इशारा दिल्यानंतर थेट शिरूर लोकसभा मतदार संघाचा भाग असलेल्या हडपसर विधानसभा मतदार संघामध्ये पाहणी दौऱ्यासाठी पार्थ पवार पोहचले.या पाहणी दौऱ्यामध्ये त्यांनी विविध विकास कामांचा आढावा घेतला आणि प्रशासनाला ते त्वरित पूर्ण करण्याचे आदेश दिले.

शिरूरमध्ये विजय मिळवायचा असेल तर हडपसर महत्वाचं

अजित पवार यांच्या हडपसर दौऱ्यानंतर आता पार्थ पवार देखील हडपसर मध्ये ॲक्टिव्ह झाल्याच्या पाहायला मिळत आहे. आज पार्थ पवार हडपसर भागातील राष्ट्रवादीच्या विविध नेत्यांच्या आणि पदाधिकाऱ्यांच्या गाठीभेटी घेणार आहे. याबाबतचा दौरा त्यांच्याकडून जाहीर देखील करण्यात आला आहे. हडपसर हा भाग शिरूर मतदारसंघामध्ये येत असून शिरूरमध्ये विजय मिळवण्यासाठी हा सर्वाधिक महत्त्वाचा विधानसभा मतदारसंघ मानला जातो.

मागील लोकसभा निवडणुकीमध्ये मावळ मतदारसंघातून पार्थ पवार यांना पराभव स्वीकारावा लागला. यानंतर पार्थ पवार हे तुरळकच राजकीय व्यासपीठावरती आणि राजकीय भेटीगाठी घेताना दिसले. त्यामुळे आता लोकसभा निवडणुकीच्या पार्श्वभूमीवर पार्थ पवार यांच्या भेटीगाठी घेण्यामुळे पार्थ पवार शिरूर मतदारसंघामधून लोकसभेची निवडणूक लढवण्यासाठी इच्छुक तर नाहीत ना अशा चर्चांना उधाण आला आहे. त्यामुळे कोल्हेंविरोधात पार्थ पवार असा अजित पवारांचा गेम प्लॅन तर नाही ना अशा चर्चा राजकीय वर्तुळात सुरू आहेत.