पक्षाच्या धंतोली येथील कार्यालयासमोर ढोलताशे, आतषबाजीच्या निनादात संपर्क प्रमुख मंगेश काशीकर, जिल्हा प्रमुख सूरज गोजे, महिला संघटक मनीषा पापडकर व अन्य पदाधिकाऱ्यांच्या उपस्थितीत जल्लोष करण्यात आला. शिवधनुष्य, भगवे झेंडे तसेच, शिवसेनाप्रमुख बाळासाहेब ठाकरे, मुख्यमंत्री एकनाथ शिंदे, आनंद दिघे यांचे छायाचित्र हातात घेऊन शिवसैनिकांनी ‘जय भवानी, जय शिवाजी’ अशा घोषणा दिल्या. यावेळी शहर प्रमुख समीर शिंदे, धीरज फंदी, युवा सेना जिल्हा प्रमुख नीलेश तिघरे, गणेश डोईफोडे, जगतराम सिन्हा आदी उपस्थित होते.
ठाकरे गटाची आज बैठक
ठाकरे गटाच्यावतीने रेशीमबाग येथील शिवसेना भवनात आज गुरुवार, ११ जानेवारी रोजी बैठक आयोजित करण्यात आली आहे. यात पुढील रणनीतीवर चर्चा करण्यात येईल.
‘हा शिवसैनिकांचा विजय’
‘खोके सरकार’, ‘मिंधे सरकार’, ‘अलीबाबा आणि ४० चोर’ यासारखे अनेक आरोप गेल्या दीड-पावणे दोन वर्षापासून केले जात होते. विधानसभाध्यक्ष राहुल नार्वेकर यांनी दिलेला निकालाने विरोधकांच्या आरोपातील हवा काढली. संपूर्ण पक्ष व चिन्ह एकनाथ शिंदे यांना मिळाले. हा खऱ्या अर्थाने निष्ठावान शिवसैनिकांचा विजय झाला. सामान्य शिवसैनिकास मुख्यमंत्री करू, असे उद्धव ठाकरे यांनी जाहीर केले होते, तसे न करता सत्तेसाठी विरोधकांशी हातमिळवणी केली. शिंदे यांनी पक्ष व धनुष्यबाण महाविकास आघाडीच्या तावडीतून सोडवून आणला, असे शिंदे गटाचे संपर्क प्रमुख मंगेश काशीकर म्हणाले.
‘जनता उत्तर देईल’
हा निकाल म्हणजे सत्ता जिंकली, राज्यघटना, सर्वोच्च न्यायालयाचा अवमान आहे. १९९९ सालची घटना मान्य केल्यास त्यात एकनाथ शिंदे कुठेही नव्हते. २०१८ सालची घटना मान्य नाही; तर, २०२२ची कशी मान्य होऊ शकते. आजचा निकाल राज्यघटनेची पायमल्ली करणारा आहे. यावर राज्यातील जनताच उत्तर देईल, अशी प्रतिक्रिया ठाकरे गटाचे जिल्हा प्रमुख किशोर कुमेरिया यांनी व्यक्त केली.