रोहित पवार यांनी अजित पवार हे सोयीस्कर भूमिका घेत असल्याचा आरोप केला. शरद पवार साहेब आजपर्यंत आम्हा सर्वांना मार्गदर्शनच करत आले आहेत. अजित पवार त्यांचे वय झाल्याचा मुद्दा उपस्थित करतात. पण आम्ही काही बोलतो तेव्हा अजित पवार, आमचं वय कमी असल्याचे सांगतात. आम्ही बच्चे आहोत, लहान आहोत, असे सांगितले जाते. माझं वय सध्या ३८ आहे. या वयात शरद पवार हे देशातील सर्वात तरुण मुख्यमंत्री झाले होते. अजितदादा हे जेव्हा पवार साहेबांविषयी बोलतात तेव्हा त्यांचं वय जास्त असल्याचे सांगतात. पण मला असं वाटतं की, कोणाचं वय ६५ आहे, कोणाचं ७० आहे, कोणाचं ६३ आहे. आपलं वय जसं वाढेल तसतसे आपलंच वय योग्य आहे, बाकी मुलामुलींचं आणि नेत्यांचं वय अयोग्य आहे, असे अजित पवार यांचे मत असावे. त्यामुळे सगळ्याच गोष्टी, सगळीच पदं आपल्याला मिळावीत. त्यासाठी आपले वय नेहमीच योग्य असेल, अशी अजित पवारांची धारणा असावी, असे रोहित पवार यांनी म्हटले.
शरद पवारांसमोर जाणं अजितदादांनी पुन्हा टाळलं
वसंतदादा शुगर इन्स्टिट्यूट येथे होणाऱ्या ४७ व्या वार्षिक सर्वसाधारण सभेच्या निमित्ताने गुरुवारी शरद पवार आणि अजित पवार एकाच मंचावर येणार होते. मात्र, अजित पवार यांनी ऐनवेळी या कार्यक्रमाला न येण्याचा निर्णय घेतला. या मुद्द्यावरुन रोहित पवार यांनी अजितदादांना टोला हाणला. आज अजितदादा बैठकीला येणार हे मला कळलं होतं. पण त्यांना महत्त्वाचे काम आले असावे. मुख्यमंत्री एकनाथ शिंदे, उपमुख्यमंत्री देवेंद्र फडणवीस हे अकार्यक्षम असावे आणि अजितदादा हे कार्यक्षम असतील म्हणून ते आजच्या सभेला आले नसावेत. माझा कार्यक्रम बारामतीमध्ये होता. पण आजचा कार्यक्रम महत्त्वाचा होतं म्हणून मी आलो, दुसरे का नाही आले मला माहिती नाही, असे रोहित पवार यांनी म्हटले.
अजित पवार नेमकं काय म्हणाले होते?
सरकारमध्ये काम करणारे ५८पासून ७५पर्यंतच्या वयात निवृत्ती घेतात; मात्र काहीजण ८४ वर्षे उलटली तरी थांबण्याचे नाव काढत नाहीत. आम्हालाही लोकांसाठी चांगले निर्णय घेता येतात, हे आम्ही सिद्ध केले आहे. मात्र काही जण ऐकत नाहीत; हट्टीपणा करत राहतात’, अशी अप्रत्यक्ष टीका अजित पवारांनी राष्ट्रवादी काँग्रेसचे अध्यक्ष शरद पवार यांच्यावर केली होती.