फिर्यादीनुसार, आरोपी राज जाधव, मृत यश महेंद्रकर आणि फिर्यादी हे सर्व मित्र होते. २४ एप्रिल २०२१ रोजी रात्री ९ वाजेच्या सुमारास श्रीकांत हा तुळजाभवानी चौकातील बिकानेर मिठाई दुकानासमोर बसलेला होता. त्यावेळी तिथे आरोपी राज जाधव हा मित्र अर्थव टाकळकर, ओंकार कोलते यांच्यासोबत आला आणि ‘आता मी यश महेंद्रकरला मारणार आहे’ असे म्हणाला. श्रीकांत याने राजकडे चौकशी केली असता, ‘यशने शिवीगाळ केल्याने त्याला सोडणार नाही’ असे तो म्हणाला. श्रीकांत त्याला समजावून सांगत असताना राजने यशला फोन करुन तुळजाभवानी चौकात बोलावले.
साडेनऊ वाजेच्या सुमारास एका कारमध्ये आरोपी व फिर्यादीचे मित्र मित्तल उबाळे, अमय म्हस्के, पुष्कर भारंबे असे तिथे आले. त्याचेळी यश महेंद्रकर हा दुचाकीवर तिथे आला. यशला पाहताच राज चाकू घेऊन त्याच्या अंगावर गेला. चाकू पाहून सर्व मित्रांनी राजला पकडले. हे पाहून यशदेखील राजला मारण्यासाठी समोर येत होता. भांडण सुरू असताना राजने यशजवळ येताच त्याच्या पोटात चाकू भोसकून गंभीर जखमी केले. यशला विशाल भोसले आणि प्रफुल्ल बोरसे यांनी दुचाकीवर खासगी रुग्णालयात दाखल केले. उपचार सुरू असताना यश महेंद्रकर याचा मृत्यू झाला. प्रकरणात हर्सूल पोलीस ठाण्यात गुन्हा दाखल करण्यात आला.
खटल्याच्या सुनावणीवेळी, अतिरिक्त सरकारी अभियोक्ता अशोक बी. करंडे यांनी २४ साक्षीदारांचे जबाब नोंदवले. त्यात फिर्यादीसह मुख्य आठ साक्षीदार फितूर झाले. तर, तपास अधिकारी व वैद्यकीय अधिकार्‍यांची साक्ष महत्वाची ठरली. विशेष म्हणजे या खटल्यात फौजदारी दंड संहितेच्या (सीआरपीसी) कलम ३४० प्रमाणे खोटी साक्ष देणारे आरोपीचे मित्र तथा फिर्यादी श्रीकांत शिखरे, ओंकार कोलते, विशाल भोसले, प्रफुल्ल बोरसे, अमेय म्हस्के, अथर्व टाकळकर, पुष्कर भारंबे व मित्तल उबाळे यांच्यावरही भादंवी कलम १९३ प्रमाणे कारवाई करण्याचे आदेश न्यायालयाने दिले आहेत. त्याचवेळी मृत यश सोमेश महेंद्रकर (रा. एसबीओए शाळेच्या पाठीमागे, हडको) यांच्या आई-वडिलांना नुकसान भरपाई देण्याचे आदेश विधी व सेवा प्राधिकरणाला दिले आहेत.