मोहोळच्या खुनाच्या कटात सहभागी असलेल्या आणि पिस्तूल खरेदीसाठी आर्थिक मदत करणाऱ्या तिघांना पुणे पोलिसांच्या गुन्हे शाखेने शुक्रवारी रात्री उशिरा अटक केली. आदित्य विजय गोळे (वय २४), नितीन अनंता खैरे (वय ३४, रा. कोथरूड) आणि संतोष दामोदर कुरपे (रा. कोथरूड) अशी त्यांची नावे आहेत. आरोपींना शिवाजीनगर न्यायालयात हजर करण्यात आले असता, १७ जानेवारीपर्यंतची पोलिस कोठडी सुनावली. मोहोळचा पाच जानेवारीला सुतारदरा येथे राहत्या घराजवळ मुन्ना पोळेकर आणि त्याच्या साथीदारांनी गोळ्या झाडून खून केला. खून करून पळून जाण्याच्या प्रयत्नात असलेल्या आरोपींना गुन्हे शाखेने पाठलाग करून अटक केली होती. अटकेतील आरोपींमध्ये दोन वकिलांचाही सहभाग आहे. या प्रकरणात आतापर्यंत १३ जणांना अटक करण्यात आली आहे.
बंदुकीसाठी पैसे; सरावाला हजेरी
‘मोहोळचा खून करण्यासाठी आरोपींनी महिन्यापूर्वी कट रचला. त्यासाठी आरोपींनी मुळशी तालुक्यातील हाडशी परिसरात गोळीबाराचा सराव केला होता. त्या वेळी आरोपी खैरे मुन्ना पोळेकरसोबत तेथे हजर होता. या प्रकरणात पैशाची संपूर्ण व्यवस्था खैरे याने केली होती. गोळे यांनी बंदुकीसाठी पैसे पुरवले होते. मोहोळचा खून करण्यासाठी रचण्यात आलेल्या कटात तो सहभागी होता,’ असा पोलिसांचा दावा आहे.
‘अनोळखी नंबरवरून मिळाला निरोप’; आरोपीचा संबंध नसल्याचा दावा
आरोपी संतोष कुरपे फोनवरून पोळेकरच्या संपर्कात होता; तसेच, तो संपूर्ण कटातही सहभागी होता. मोहोळचा खून केल्यानंतर आरोपींनी तेथून पळ काढला. ते चांदणी चौकात पोहोचले आणि साथीदारांसोबत पुण्याबाहेर जात होते. त्या वेळी पोळेकरने मोबाइलमधील सीमकार्ड बदलून कुरपेला फोन केला. ही बाब ‘कॉल डिटेल्स रिपोर्ट’मधून (सीडीआर) समोर आली. पोळेकरने ‘शरदचा गेम झाला’ असा निरोप मास्टरमाइंडला द्यायला सांगितला होता, असा दावा तपास अधिकारी, सहायक आयुक्त सुनील तांबे यांनी न्यायालयात केला. कुरपे हा कोथरूडच्या एका प्रथितयश संस्थेत ऑफिस असिस्टंट पदावर कार्यरत आहे.
कुरपेच्या वतीने अभिरक्षक न्यायालयाच्या वतीने अॅड. मयूर दोडके यांनी न्यायालयात बाजू मांडली. ‘कुरपेला अनोळखी क्रमांकावरून फोन आला होता. तो त्याने उचलला. समोरून शरद मोहोळचा गेम केला असून मास्टरला सांगा,’ असे सांगितले. पोलिसांनी चौकशीसाठी ११ जानेवारीला बोलावले होते. त्यावेळीच कुरपे याने ही माहिती दिली होती. त्यामुळे त्याला किमान पोलिस कोठडी देण्याची विनंती दोडके यांनी केली.