अ‍ॅड. असीम सरोदे काय म्हणाले?
कायदा जर लोकांसाठी असेल तर लोकांमध्ये बोलला गेला पाहिजे, असं अ‍ॅड. असीम सरोदे म्हणाले. जनता न्यायालयात केवळ सत्याची बाजू मांडली जाईल. शिवसेनेनी हा कार्यक्रम आयोजित केला याबाबत त्यांचे आभार मानतो, असं सरोदे म्हणाले. राहुल नार्वेकर यांच्याबद्दल व्यक्ती म्हणून काही बोलायचं नाही पण कायदेविरोधी प्रवृत्ती तयार होत आहे त्याबद्दल बोलायला हवं. १० जानेवारी २०२४ चा निकाल समजून घेणं, त्याचं विश्लेषण करणं हे समजून घेणं आवश्यक आहे, असं सरोदे म्हणाले.
उद्धव ठाकरे हे संविधानाच्या बाजूनं आहेत, असं सरोदे यांनी म्हटलं. पक्षांतर बंदी कायदा हे १० व्या परिशिष्ठाचं नाव आहे. १० व्या परिशिष्ठाचं नाव पक्षांतर सोप्या पद्धतीनं करणं असं त्याचं नाव नाही, असं असीम सरोदे म्हणाले. राजकीय अस्थैर्य निर्माण होऊ नये यासाठी राजीव गांधी यांनी हा कायदा आणला, असं सरोदे यांनी म्हटलं.
असीम सरोदे यांनी यापुढे बोलताना पक्षांतर बंदी कायद्याविषयी माहिती दिली. विधिमंडळ पक्षाचं आयुष्य हे पाच वर्षांचं असतं. विधिमंडळ पक्ष ही अस्थायी स्वरुपाची व्यवस्था आहे. मूळ राजकीय पक्षाला महत्त्व आहे. एकनाथ शिंदे आणि पळून गेलेले सदस्य हे पाच वर्षांच्या अस्थायी पक्षाचे सदस्य आहेत, असं सरोदेंनी म्हटलं.
पक्षांतरबंदी कायद्यानुसार राजकीय पक्ष स्वत:हून सोडायचं असेल तर ते पक्ष सोडू शकतात, मात्र ते आमदार म्हणून कार्यरत राहू शकत नाहीत. व्हीपचं पालन न केल्यास त्यांची अपात्रता होऊ शकते. पक्षात फूट झाली असेल तर पूर्वी संरक्षण असायचं. मात्र, आता फूट पडलीय, जास्त संख्येने आहोत असं म्हणण्याचा अधिकार कुणाला राहिलेला नाही. पक्ष सोडणाऱ्यांना राजकीय पक्षात विलीन होऊ शकतात, राजकीय गट निर्माण करु शकतात. शिंदे गटाचे लोक कोणत्याही पक्षात विलीन झालेले नाहीत. त्यामुळं ते अपात्र ठरतात. दोन तृतियांश लोकं बाहेर गेले तर त्यांना वेगळा राजकीय गट स्थापन करता येतो. मात्र, एकनाथ शिंदे हे दोन तृतियांश संख्येने बाहेर गेले नाहीत. ते पहिल्यांदा १६ जण गेले होते. नंतर काही जण सूरत, गुवाहाटी, गोवा आणि मुंबईत जाऊन मिळाले. मात्र, हे दोन तृतियांश बहुमतानं बाहेर पडले नाहीत त्यामुळं ते अपात्र होऊ शकतात, असं असीम सरोदे म्हणाले.
Read Latest Maharashtra News And Marathi News