सुशीलकुमार शिंदे आणि त्यांच्या कन्या काँग्रेस आमदार प्रणिती शिंदे यांना भाजपची ऑफर होती असे स्वतः सुशीलकुमार शिंदे यांनी सांगितल्याने राज्यभर राजकीय वादळ उठले आहे. परंतु भाजप मध्ये प्रवेश करणाऱ्यापैकी सुशीलकुमार शिंदे तर नक्की नाहीत, असं पालकमंत्री चंद्रकांत पाटील यांनी खुलासा करताना सांगितले.
नितीन गडकरींचा उल्लेख
महाराष्ट्र राज्याचे माजी मुख्यमंत्री सुशीलकुमार शिंदे हे भाजपमध्ये २०१९ ला ही इच्छुक नव्हते आणि आताही नाही. भाजपकडून अधिकृत कुणी त्यांना ऑफर दिली नाही. शेवटी नात्याच्या आधारे, रिलेशनच्या आधारे, सुशीलजी येणार की नाही, असं कुणीतरी म्हटल असेल. विद्यमान केंद्रीय मंत्री नितीन गडकरींसारखे आमचे नेते ते शिंदेचे चांगले मित्र आहेत.आता ही शिंदे यांनी नितीन गडकरी यांच्या आठवणी काढल्या. त्यातलं कुणी म्हणालं असेल तर ती काय राजकीय भेट म्हणता येणार नाही. किंवा राजकीय ऑफर म्हणता येणार नाही. राजकीय भेट ही तुम्हाला वर्षानुवर्षे कळत नाही. राजकीय भेट अतिशय गुप्त असते आणि इतक्या जाहीरपणे मी आलो. सगळे नाट्य संमेलनाचे पदाधिकारी बरोबर घेवून आलो. जेव्हा केव्हा त्यांची राजकीय भेट होईल. होईल की नाही माहित नाही. पण तेव्हा तुम्हाला कळणार ही नाही, असंही चंद्रकांत पाटील म्हणाले.
शिंदेचं कुटुंब अतिशय सुसंस्कृत, त्यांच्यावर कुणी शिंतोडे उडवू शकत नाही
सुशीलकुमार शिंदे सारख्या काही फॅमिलीज या महाराष्ट्राच्या राजकारणामध्ये सुसंस्कृत कुटुंब म्हणून प्रसिद्ध आहेत. शिंदे कुटुंबावर कधीही कोणी शिंतोडे उडवले नाहीत. त्यांच्याच पाऊलावर पाऊल ठेवून प्रणितीताईही आक्रमक आहेत पण सर्वसामान्य माणसाच्या प्रश्नासाठी आक्रमक आहेत. अशी सुसंस्कृत फॅमिली आक्रमक प्रणिती ताई भारतीय जनता पार्टीत आल्या तर त्यांचं स्वागतच करू पण अशी कुठलीही ऑफर ना भाजपने दिली, ना अशी कुठलीही इच्छा त्यांनी व्यक्त केली, असंही चंद्रकांच दादा म्हणाले.
राजकीय ऑफर ही गुप्त असते : चंद्रकांत पाटील
ही माझी केवळ सदीच्छा भेट होती. पालकमंत्री या नात्याने मी त्यांच्याकडे आलो आहे. आणि भाजपकडून कोणतीही ऑफर त्यांना देण्यात आलेली नाही. आणि कोणतीही राजकीय ऑफर अशी जाहीर पणे दिली जात नसते. ती गुप्त पद्धतीने असते, असंही सांगायला चंद्रकांत दादा सांगायला विसरले नाहीत.