जळालेल्या अवस्थेतील नग्न मृतदेह भल्या पहाटे सापडला, मॉर्निंग वॉकला आलेल्या नागरिकांमुळे घटना उघडकीस

सातारा : सातारा शहरातील राजवाडा परिसरात असलेल्या नगर वाचनालयाजवळ एका पुरुषाचा अर्धवट जळालेल्या नग्न अवस्थेत मृतदेह आढळून आला. त्यामुळे नागरिकांमध्ये एकच खळबळ उडाली आहे. ही घटना आज सकाळी नागरिक मॉर्निंग वॉकला आले असता उघडकीस आली. गोपाळ विजयकुमार लकिरे असं या व्यक्तीचं नाव आहे. या घटनेची माहिती मिळताच शाहूपुरी पोलीस घटनास्थळी दाखल झाले आहेत.

मिळालेल्या माहितीनुसार, आज सकाळी नेहमीप्रमाणे नागरिक मॉर्निंग वॉकला राजवाडा परिसरात आले असता त्यांना नगर वाचनालयाजवळ एका व्यक्तीचा मृतदेह आढळून आला. तो अर्धवट नग्नावस्थेत जळालेला असल्याने नागरिकांनी या घटनेची माहिती शाहूपुरी पोलीस ठाण्याला दिली. घटनेची माहिती मिळताच पोलीस घटनास्थळी दाखल झाले. त्यानंतर त्यांनी घटनास्थळाची पाहणी करून माहिती घेतली असता तो व्यक्ती प्रतापगंज पेठेतील रहिवासी असल्याचे समोर आले आहे. गोपाळ विजयकुमार लकिरे असं त्याचं नाव आहे. गोपाळ लकीरे याने कडाक्याच्या थंडीमुळे शुक्रवारी रात्री वाचनालयाजवळ शेकोटी पेटवली असल्याचे पोलिसांच्या तपासात निदर्शनास आले. या शेकोटीच्या ज्वालांनी त्याच्या अंगावरील कपड्यांनी पेट घेतल्याने त्याचा जळून मृत्यू झाला असल्याचा पोलिसांनी प्राथमिक अंदाज व्यक्त केला आहे.

मी असेन-नसेन, मराठ्यांची एकजूट तुटू द्यायची नाही, मुंबईला निघण्यापूर्वी जरांगेंच्या डोळ्यांत अश्रू
या घटनेची माहिती परिसरात पसरताच नागरिकांनी पाहण्यासाठी एकच गर्दी केली होती. काही वेळातच माहिती मिळताच गोपाळ लकीरे याचे नातेवाईकही त्या ठिकाणी दाखल झाले. लकीरे याचा मृत्यू कोणत्या कारणामुळे झाला याचाही शोध शाहूपुरी पोलीस करीत आहेत. शाहूपुरी पोलिसांनी पंचनामा करून लकीरे याचा मृतदेह शवविच्छेदनासाठी जिल्हा रुग्णालयात नेला. त्या वेळी त्याचे नातेवाईकही उपस्थित होते.

मंदिरात नवस सायास, लग्नानंतर १७ वर्षांनी आई बाबा झाले; बोट दुर्घटनेत दोन्ही लेकरांचा मृत्यू