हायलाइट्स:
- नांदेड जिल्ह्यातही पावसाचा धुमाकूळ
- २ जण वाहून गेले तर झाडाचा आधार घेतल्याने एक जण बचावला
- शोधकार्य अजूनही सुरूच
नांदेड : राज्यातील इतर भागांप्रमाणेच नांदेड जिल्ह्यातही पावसाने धुमाकूळ घातला आहे. मुसळधार पावसामुळे जिल्ह्यातील मुखेड उस्माननगर रस्त्यावरील मोती नाल्याला पूर आला. या पुरात एक कार वाहून गेली. या कारमधील २ जण वाहून गेले तर एकाने झाडाचा आधार घेतल्याने त्याला मदत पथकाने दोरीच्या साहाय्याने पाण्याच्या प्रवाहातून बाहेर काढलं आहे.
कारसह वाहून गेलेल्या व्यक्तींमध्ये मुखेडचे माजी आमदार किशनराव राठोड यांचा मुलगा तथा भाजपचे विद्यमान आमदार डॉ.तुषार राठोड यांचे संख्ख्ये चुलत बंधू भगवान राठोड ( ६५ ) तसंच त्यांचा मुलगा संदिप राठोड ( ३८ ) यांचा समावेश आहे.
गेल्या १० तासांपासून या बेपत्ता पितापुत्राचा शोध पथकाद्वारे शोध घेतला जात आहे. मात्र त्यांचा शोध घेण्यात अजूनही यश आलेलं नाही.
नेमकं काय घडलं?
मुखेड तालुक्यातील कमळेवाडी येथून राठोड पितापुत्र त्यांच्या घरातील कामगार उद्धव देवकते याला घेऊन कारने कमळेवाडी येथून पांडुर्णी मार्गे मुखेडकडे येत होते. सकाळी कार मुखेडनजीक असलेल्या मोती नाल्याजवळ आली असता संदिप राठोड यास पाण्याच्या प्रवाहाचा अंदाज आला नसल्याने कार पाण्याच्या प्रवाहात वाहून गेली. वाहून गेलेली कार सापडली असली तरी अद्यापही राठोड पितापुत्र सापडले नाही.
दरम्यान, रात्र झाल्याने शोध कार्यास अडचणी येत असल्याने उद्या सकाळी पुन्हा शोध कार्य सुरू करण्यात येणार असल्याची माहिती प्रशासनाकडून देण्यात आली आहे.