महाराष्ट्र लोकसेवा आयोगाच्या गुणोत्तर यादीत तो १४१ व्या क्रमांकावर चमकला आहे. सावर्डे येथील सह्याद्री शिक्षण संस्थेच्या आयटी कॉलेजचा तो माजी विद्यार्थी आहे. आता लवकरच राजपत्रित अधिकारी म्हणून त्याला शासन सेवेत संधी मिळणार आहे. चिपळूण तालुक्यात डेरवण येथे पहिलीपासून दहावीपर्यंत शिक्षण झालं. त्यानंतर दहावी ते बारावी विवेकानंद शिक्षण संस्था कोल्हापूर येथे शिक्षण पूर्ण केलं. त्यानंतर सावर्डे येथील सह्याद्री शिक्षण संस्थेच्या महाविद्यालयात प्रवेश घेतला. या महाविद्यालयातून बीएससी आयटीपर्यंत शिक्षण त्याने पूर्ण केले.
त्यानंतर त्यांनी तब्बल चार वेळा एमपीएससी परीक्षा दिली. पण त्यात यश आलं नाही. त्यानंतर दोन वर्ष कोरोना कालावधीत गेली. २०२२ साली त्याने दिलेल्या एमपीएससी परीक्षेत त्याने हे यश खेचून आणलं आहे. यासाठी त्यांनी पुण्यातील सारथी संस्थेकडून ऑनलाईन मार्गदर्शन घेत घरीच पुस्तक आणून अभ्यास केला. दोन वर्षांपूर्वी पुण्यातही एका क्लास जॉईन केला होता. तेथील सरांचंही मार्गदर्शन मिळालं. सिद्धांताचे वडील हे सावर्डे येथील सह्याद्री शिक्षण संस्थेच्या हायस्कूलचे निवृत्त मुख्याध्यापक आहेत. आई गृहिणी आहे तर सिद्धांताचा छोटा भाऊ हा सिव्हिल इंजिनियर आहे.
येत्या काही दिवसात अंतिम निकालात महाराष्ट्र शासनाची कोणत्या पदावर सेवा बजावण्याची संधी मिळेल ते स्पष्ट होईल. माझ्या या यशात माझे वडील प्रदीप विठ्ठलराव सावंत आणि आई अपर्णा प्रदीप सावंत यांनी सतत पाठिंबा आणि प्रोत्साहन दिले. वडिलांकडून आपल्याला प्रेरणा मिळाली. भाऊ करण सावंत, उन्मेष कळेकर यांनी साथ दिली. चिपळूण येथील मित्र आणि प्रमुख मार्गदर्शक IAS अधिकारी प्रथमेश राजेशिर्के यांचे वेळोवेळी योग्य मार्गदर्शन लाभले. मी २०१९ ला एमपीएससीचा अभ्यास सुरू केला. पुढे राज्यसेवा आणि गट ब च्या जवळपास सात मुख्य परीक्षा दिल्या. हा माझा चौथा प्रयत्न होता. माझे शालेय शिक्षण डेरवण येथील विठ्ठलराव जोशी इंग्लिश मीडियम शाळेत झाले. त्यानंतर सावर्डे येथील सह्याद्री शिक्षण संस्थेच्या ICSIT मधून BSc(IT) केले. या माझ्या आयुष्यात सगळ्या शिक्षकांचाही मोठा वाटा असल्याचं सिद्धांत याने ‘महाराष्ट्र टाइम्स’ जवळ बोलताना सांगितलं.