OnePlus चा सर्वात स्वस्त फ्लॅगशिप फोन भारतीयांच्या भेटीला; सोनीच्या कॅमेऱ्यासह OnePlus 12R ची एंट्री

चीनी स्मार्टफोन निर्माता कंपनी वनप्लसनं गेल्या महिन्यात OnePlus Ace 3 सादर केला होता. तर आता या डिवाइसचा रीब्रँडेड व्हर्जन भारतात OnePlus 12R नावाने सादर केला आहे. या डिवाइस व्यतिरिक्त कंपनीनं एका मेगा इव्हेंटच्या माध्यमातून फ्लॅगशिप हँडसेट OnePlus 12 आणि OnePlus Buds 3 देखील सादर केले आहेत. या लेखात आपण कंपनीच्या नंबर सीरिजच्या सर्वात स्वस्त फ्लॅगशिप मॉडेल वनप्लस १२आर ची माहिती घेणार आहोत.

OnePlus 12R ची किंमत

वनप्लस १२आर च्या ८जीबी रॅम आणि १२८जीबी स्टोरेज मॉडेलची किंमत ३९,९९९ रुपये आहे. तर, १६जीबी रॅम आणि २५६जीबी स्टोरेज असलेल्या टॉप व्हेरिएंटची किंमत ४५,९९९ रुपये आहे. वनप्लस १२आरची भारतात विक्री ६ फेब्रुवारीला दुपारी १२ वाजता सुरु होईल. लाँच ऑफर अंतर्गत आयसीआयसीआय बँक आणि वनकार्डच्या ग्राहकांना १००० रुपयांची सूट मिळेल.

हे देखील वाचा:
आतापर्यंतचा सर्वात शक्तिशाली वनप्लस भारतात लाँच; 16GB RAM सह OnePlus 12 ची एंट्री

OnePlus 12R चे स्पेसिफिकेशन्स

वनप्लस १२आर मध्ये १२०हर्ट्झ रिफ्रेश रेटसह ६.७८-इंचाचा अ‍ॅमोलेड डिस्प्ले आहे. जो २७८० x १२६४ पिक्सल रेजोल्यूशन, डॉल्बी व्हिजन, एचडीआर १०+, ४५०० निट्स पीक ब्राइटनेस आणि गोरिल्ला ग्लास विक्टस २ प्रोटेक्शन असलेला एलटीपीओ ४.० पॅनल आहे.

स्मार्टफोन क्वॉलकॉम स्नॅपड्रॅगन ८ जेन २ चिपसेटवर चालतो जो गेल्यावर्षीचा फ्लॅगशिप प्रोसेसर आहे. जोडीला १६जीबी पर्यंत एलपीडीडीआर५एक्स रॅम आणि २५६जीबी यूएफएस ४.० स्टोरेज मिळते. हा फोन अँड्रॉइड १४ आधारित ऑक्सिजन ओएसवर चालतो. सोबत आयपी६४ रेटिंग आणि वाय-फाय ७ चा सपोर्ट मिळतो.

वनप्लस १२आर मध्ये सोनी आयएमएक्स८९० ५०एमपी प्रायमरी सेन्सर, ११२-डिग्री ८एमपी अल्ट्रा-वाइड कॅमेरा आणि २एमपी मॅक्रो कॅमेरा आहे. सेल्फीसाठी तुम्हाला १६एमपीचा फ्रंट कॅमेरा मिळतो. स्मार्टफोनमध्ये १००वॉट सुपरवूक चार्जिंगसह ५,५००mAh ची बॅटरी देण्यात आली आहे. ही बॅटरी फक्त २६ मिनिटांच्या चार्जिंगमध्ये १ पासून १०० टक्क्यापर्यंत चार्ज होते. वनप्लसची आता पर्यंतची सर्वात मोठी बॅटरी आहे.