प्रदेशाध्यक्ष चंद्रशेखर बावनकुळे यांनी सहा महिन्यांपूर्वी नांदेड जिल्ह्याची कार्यकारिणी जाहीर केली होती. महानगराध्यक्ष पदी दिलीप कंदकुर्ते, ग्रामीण जिल्हाध्यक्ष पदी संतुक हंबर्डे आणि नांदेड उत्तर जिल्हाध्यक्ष म्हणून सुधाकर भोयर यांची निवड करण्यात आली होती. मात्र, सुधाकर भोयर यांच्या निवडी पासून पदाधिकाऱ्यांमध्ये नाराजीचा सूर होता. पदवाटप करण्यासाठी ते पैसे घेत असल्याचा आरोप पदाधिकाऱ्यांकडून केला जात होता. शिवाय ते कार्यकर्त्यांना उद्धट बोलतात अशा तक्रारी थेट भाजप प्रदेशाध्यक्ष चंद्रशेखर बावनकुळे यांच्याकडे करण्यात आल्या होत्या.
भोकर, मुदखेड, अर्धापूर, हदगांव, हिमायतनगर, माहूर, किनवट या तालुक्यातील भाजपाचे आजी माजी पदाधिकारी चार वेळेस प्रदेशाध्यक्ष चंद्रशेखर बावनकुळे यांची भेट घेतली होती. दहा दिवसांपूर्वी देखील पदाधिकऱ्यांचं एक शिष्टमंडळ भेटीसाठी नागपूर गेले होते. यावेळी शिष्टमंडळाने भोयर हटाव अशी मागणी केली होती.
दरम्यान भाजपाकडून एक गोपनीय समिती द्वारे चौकशी करण्यात आली. त्यात सुधाकर भोयर यांच्या वरील आरोप सिद्ध झाल्याने भाजप प्रदेशाध्यक्ष चंद्रशेखर बावनकुळे यांनी तडकाफडकीने त्यांची नांदेड उत्तर जिल्हाध्यक्ष पदावरून उचलबांगडी करून त्यांची प्रदेश कार्यकारिणी सदस्य म्हणून निवड करण्यात आली आहे.
दरम्यान, खासदार प्रताप पाटील चिखलीकर यांचे निकटवर्तीय असलेले अ‍ॅड. किशोर देशमुख यांना नांदेड उत्तर जिल्हाप्रमुख पदाची जबाबदारी देण्यात आली आहे. किशोर देशमुख हे युवा नेते आहेत. यापूर्वी ते राष्ट्रवादी काँग्रेस होते. त्यानंतर त्यांनी भाजप मध्ये प्रवेश केला. दरम्यान सुधाकर भोयर हे पैसे घेऊन पद वाटप करत असल्याची बाब समोर आल्याने भाजप गोठ्यात खळबळ उडाली आहे.
Read Latest Maharashtra News And Marathi News