अरविंद भोसले हा आपल्या आई वडिलांना एकुलता एक होता. बेरोजगार असल्याने मिळेल ते काम करून घर चालवायचा. आई वडील देखील मोल मजुरी करतात. मराठा आरक्षणासाठी तो गावात नेहमी सक्रिय देखील राहायचा. मनोज जरांगे पाटील हे आंदोलनासाठी मुंबईकडे रवाना झाले आहेत. आंदोलनामध्ये सहभागी होण्यासाठी अरविंद मुंबईला जाण्याची तयारी करत होता. मात्र त्याआधीच बुधवारी रात्री गावातील चिंचाच्या झाडाला दोरीने गळफास घेऊन त्याने जीवन यात्रा संपवली.
आत्महत्येपूर्वी अरविंदने चिठ्ठी देखील लिहली होती. त्यात मराठाना आरक्षण मिळालेच पाहिजे, नाही तर माझ्या मरणाला अर्थ राहणार नाही. एक मराठा लाख मराठा असा उल्लेख आहे. गावकऱ्यांनी घटनेची माहिती लिंबगाव पोलिसांना दिली. पोलिसांनी घटनास्थळी पोहचून पंचनामा केला. या घटनेने सर्वत्र हळहळ व्यक्त होतं आहे.
सहा महिन्यात सात जणांची आत्महत्या..
मराठा समाजाला आरक्षण मिळावे यासाठी नांदेड जिल्ह्यात मागील सहा महिन्यात सात जणांनी आपली जीवन यात्रा संपवली आहे. यात दोन शाळकरी विद्यार्थ्यांचा समावेश आहे. जिल्हा प्रशासनाच्या वतीने मुख्यमंत्री सहाय्यता निधीतून कुटुंबीयांना प्रत्येकी दहा लाख रूपये मदत देण्यात आली आहे.
३८४ कुणबी प्रमाणपत्राचे वाटप
मराठा आरक्षण प्रश्नी सन १९६७ पूर्वीच्या २५ लाख ९० हजार १६८ अभिलेखामधील नोंदी तपासल्या आहेत. ही तपासणी प्रक्रिया निरंतर चालू आहे. त्यापैकी १७४८ अभिलेखांमध्ये कुणबी जातीचा उल्लेख असलेल्या नोंदी आढळून आल्या आहे. तसेच कुणबी जातीचे ३८४ प्रमाणपत्रांचे वाटप करण्यात आले आहे.