पो.स्टे.वाशिम ग्रामीण हद्दीतील फिर्यादी गजानन खंडूजी घुले, रा. चिखली बु. यांनी ग्रामीण पोलीस स्टेशनला दिलेल्या तक्रारीवरून त्यांची भाची मृतक नामे मेघा उर्फ रेवती गजानन शिंदे रा. वाघजाळी हिचा विवाह ग्राम वाघजाळी येथील गजानन बबन शिंदे याच्यासोबत १ जून २०२३ रोजी संपन्न झाला होता. सदर विवाहितेचा पती गजानन शिंदे, सासरे बबन श्यामराव शिंदे, सासू पार्वती बबन शिंदे सर्व रा. वाघजाळी यांनी चारचाकी गाडी घेण्याकरता मामाकडून ५ लाख रु.आणण्याच्या कारणावरून सतत शारीरिक व मानसिक छळ करत होते.
भाचीला होत असलेल्या त्रासाला कंटाळून मामाने मागील दिवाळीपूर्वी चेकद्वारे २ लाख आणि नगदी ५० हजार रु. दिले असताना सुद्धा आरोपींनी रेवती हिला त्रास देणे सुरूच ठेवले. २७ जानेवारी रोजी सकाळी अंदाजे चार वाजताच्या दरम्यान आरोपी गजानन बबन शिंदे (वय २१) वर्ष याने त्याच्या वाघजाळी येथील राहते घरातील धारदार शस्त्राने मृतक हिच्या गळ्यावर वार करुन तिला जीवानिशी ठार केले.
सदर प्रकरणी वाशिम ग्रामीण येथे गुन्हा नोंद करण्यात आला असून मृतक हिचे सासरे बबन श्यामराव शिंदे याला चौकशीकामी ताब्यात घेण्यात आले आहे. आरोपी गजानन शिंदे हा घटनास्थळावरून पसार झाला होता. पोलीस त्याचा शोध घेत असता त्याने आत्महत्या करण्याच्या उद्दिष्टाने विष प्राशन केलं परंतु त्याला तात्काळ वाशीम येथील खाजगी रुग्णालयात दाखल केले असून आरोपीची प्रकृती चिंताजनक असून डॉक्टर त्याच्यावर उपचार करत असल्याची माहिती मिळत आहे.