ठाकरे गटाचे नेते खासदार अनिल देसाई यांचे स्वीय सहाय्यक दिनेश बोभाटे यांच्यावर सीबीआयने गुन्हा दाखल केला आहे. गेल्या काही दिवसांपासून ठाकरे गटाचे खासदार अनिल देसाई यांचे स्वीय सहाय्यक दिनेश बोभाटे यांच्यावर बेहिशोबी मालमत्ता प्रकरणी गुन्हा दाखल केला आहे. यामध्ये दिनेश बोभाटे यांनी आपल्या मिळकतीपेक्षा ३६ टक्के बेहिशोबी मालमत्ता कमावल्याचा आरोप सीबीआयने केला आहे. न्यू इंडिया इन्शुरन्स कंपनीमध्ये दिनेश बोभाटे असिस्टंट आणि सीनियर असिस्टंट म्हणून कार्यरत होते. २०१४ ते २०२३ या काळात बोभाटे यांनी आणि त्यांच्या पत्नी देवश्री बोभाटे यांनी बेहिशोबी मालमत्ता कमावल्याचा सीबीआयने आरोप केला आहे. याप्रकरणी सीबीआयने दिनेश बोभाटे यांच्यावर गुन्हा दखल केला आहे.
ठाकरे गटाचे आमदार रवींद्र वायकर यांच्यावर जोगेश्वरी येथील महापालिकेचा भूखंड अवैधरित्या ताब्यात घेऊन तेथे हॉटेल आणि मातोश्री क्लब बांधल्याचा आरोप करत हा ५०० कोटी रुपयांचा घोटाळा केल्याचा आरोप किरीट सोमय्या यांनी केला आहे. त्याप्रकरणी ईडीकडून रवींद्र वायकर यांची चौकशी सुरू आहे. गेल्या महिनाभरात रवींद्र वायकर यांना ईडीने तीन वेळा समन्स बजावले होते. त्यानंतर अखेर रवींद्र वायकर हे चौकशीला हजार झाले आहेत.
वरळीतील एसआरएचे गाळे लाटल्याचा आरोप किरीट सोमैया यांनी किशोरी पेडणेकर यांच्यावर केला होता. तसेच किशोरी पेडणेकर यांच्या मुलाच्या कंपनीला कोविड काळात कंत्राट देऊन घोटाळा केल्याचा आरोपही करण्यात आला होता. त्याबरोबरच कोविड काळात बॉडी बॅग घोटाळा केल्याची टीका किरीट सोमैया यांनी केली होती. यासंदर्भात किशोरी पेडणेकर यांना ईडीने समन्स बजावले आहे. संजय राऊत यांचे बंधू संदीप राऊत यांनाही कथित खिचडी घोटाळा प्रकरणी समन्स बजावण्यात आले आहे. त्यात आता अनिल देसाई यांचे स्वीय सहाय्यक दिनेश बोभाटे यांच्यावरही सीबीआयने गुन्हा दाखल केल्याने ठाकरे गटातील नेत्यांच्या मागे चौकशीचे शुक्लकाष्ठ लागल्याचे दिसून येत आहे.