मनविसेचे राज्य उपाध्यक्ष सुमीत वर्मा यांनी दावा केला की, अ‍ॅड. सदावर्ते यांचे मानसिक संतूलन बिघडले आहे. त्यामुळे राज ठाकरे यांच्यावर सतत टीका करीत आहेत. म्हणून आम्ही नगरमधील प्रसिद्ध मनोविकार तज्ज्ञांची वेळ घेतली आहे. १ फेब्रुवारीला अ‍ॅड. सदावर्ते तुमच्याकडे उपचारांसाठी येतील, असे पत्र डॉक्टरांना देण्यात आले आहे.
त्यात म्हटले आहे की, महाराष्ट्रातील एक वादग्रस्त व्यक्ती गुणरत्न सदावर्ते हे गेल्या काही दिवसांपासून वैफल्यग्रस्त होऊन नैराश्यातून मनोरूग्ण झाल्याची माहिती सूत्रांनी आम्हाला दिली आहे तरी त्यांच्यावर आपण योग्य उपचार करून त्यांना लवकर बरे करावे यासाठी त्यांची वेळ आपल्या दवाखान्यात आरक्षित असावी म्हणून विनंती करतो. येत्या १ तारखेला सदूकाका आपल्याकडे उपचारासाठी येतील अशी अपेक्षा आहे व आपण योग्य तो उपचार करून त्यांना लवकर बरे करावे, ही विनंती, असे यात म्हटले आहे.
एवढ्यावरच न थांबता वर्मा यांनी अ‍ॅड. सदावर्ते यांनाही पत्र पाठवले आहे. त्यात म्हटले आहे की, गेल्या काही दिवसांपासून आपल्या डोक्यावर परिणाम झाल्याचे दिसून येत आहे. आपल्याकडून विविध विषयांवर कारण नसताना व संबंध नसताना पंचायत करत काही तरी गरळ ओकली जात आहे. यातून महाराष्ट्राच्या जनतेला प्रश्न पडला आहे की आपल्याला काही मानसिक रोग तर जडलेला नाही ना? कुणाचे चांगले झालेले आपल्याला खपत नाही, हे मराठा आरक्षणावर आपण ओकलेल्या घाणीमुळे सिद्ध झाले, पण हा एक मानसिक आजार आहे. तुमच्याच निकटवर्तीय सूत्रांकडून एक संशयास्पद माहिती मिळाली की तुम्हाला सकाळी, दुपारी व संध्याकाळी उठता-बसता, खाता-पिता, चालता-फिरता फक्त मनसे अध्यक्ष राजसाहेब ठाकरे हेच दिसतात. म्हणून तुम्ही काहीही झाले की थेट राज साहेबांबद्दल ओकायला लागतात. हा खूप मोठा मानसिक रोग आहे व यावर लवकरच उपचार घ्यायला हवा. परवाच आपण दोन चार माना हलवणारे विदूषक सोबत घेऊन प्रसारमाध्यमांसमोर राज ठाकरे यांच्यासंबंधी काही कारण नसताना बडबड करत वरील शंकेवर शिक्कामोर्तब केले, असे महाराष्ट्राच्या जनतेला वाटते. त्यामुळे आपल्याबद्दल काळजी वाटत आहे या भावनेतून नगरचे प्रसिद्ध मनोविकारतज्ज्ञांकडे आपल्या नावे वेळ घेतली आहे. त्यामुळे आपल्यावर प्रेम करणार्‍या लोकांखातर स्वतःचा उपचार करून घ्या. याचा सर्व खर्च आम्ही करायला तयार आहे. लवकर बरे व्हा, असे उपरोधिक पत्र वर्मा यांनी अ‍ॅड. सदावर्ते यांना पाठविले आहे.