हायलाइट्स:
- ऐन गणेशोत्सवात नांदेडमध्ये हत्येचा थरार
- भर दिवसा युवकाला चाकूने भोसकलं
- हतेच्या घटनेमुळे हिमायतनगरमध्ये तणावाचं वातावरण
नांदेड : नांदेडमध्ये ऐन गणेशोत्सवात हत्येचा धक्कादायक प्रकार समोर आला. भर दिवसा एका १७ वर्षाच्या युवकाचा चाकुने भोसकून खुन करण्यात आला आहे. या घटनेमुळे संपूर्ण परिसरात खळबळ उडाली असून पोलीस तपास सुरू असल्याची माहिती आहे.
मिळालेल्या माहितीनुसार, एका मुलाची हत्या करण्यात आली असून एक युवक जखमी झाला आहे. ही घटना आज हिमायतनगर शहरातील बसस्थानक परिसरात घडली. यश मिरासे असं हत्या झालेल्या युवकाचं नाव आहे. हत्या झालेल्यानंतर आरोपी फरार झाले आहेत. पोलीस या घटनेचा तपास करत असल्याची माहिती आहे.
हतेच्या या घटनेमुळे हिमायतनगरमध्ये तणावाचं वातावरण निर्माण झालं आहे. पोलिसांना जमलेली गर्दी पांगवण्यासाठी बरीच कसरत करावी लागली. खुनाची घटना सिसीटीव्हीत कैद झाली आहे. जखमी युवकावर हिमायतनगरच्या शासकीय रुग्णालयात उपचार सुरू असून त्याचीही चौकशी होणार असल्याची माहिती देण्यात आली आहे. अधिक माहितीनुसार, खुनाचे कारण अद्याप अस्पष्ट आहे.
दरम्यान, आरोपींना अटक करेपर्यंत मृतदेह ताब्यात घेणार नाही अशी भुमिका कुटूंबियांनी घेतली आहे. दरम्यान, आमदार माधवराव पाटील जवळगावकर यांनी घटनास्थळावर भेट देत कुटुंबियांचे सांत्वन केले आहे. तर पोलीस अधिक तपास करत आहेत.