कोल्हापुरात २३ वर्षीय तरुणाची आत्महत्या; धक्कादायक कारण आलं समोर

कोल्हापूर : अण्णासाहेब पाटील आर्थिक विकास महामंडळाच्या योजनेतून कर्ज देण्यास बँकेने टाळाटाळ केल्याने पन्हाळा तालुक्यातील एका युवकाने आत्महत्या (Kolhapur Accident) केली. राज्यात या महामंडळाच्या वतीने मराठा तरूणांना मोठ्या प्रमाणात कर्ज उपलब्ध व्हावे म्हणून आंदोलन सुरू आहे. मात्र, कर्ज देण्यास बँका टाळाटाळ करत असल्याचंच या आत्महत्येवरून पुढे आलं आहे. या घटनेमुळे जिल्ह्यात खळबळ उडाली आहे.

पन्हाळा तालुक्यातील माजनाळ येथील जय बाळासाहेब डवंग (वय २३) या युवकाने आण्णासाहेब पाटील आर्थिक मागास विकास महामंडळाच्या योजनेतून डेअरी फार्मसाठी कोल्हापूर जिल्हा मध्यवर्ती सहकारी बँकेच्या पुनाळ शाखेकडे कर्ज मागितलं. १० लाखाचा हा प्रस्ताव होता. त्याने कर्जासाठी लागणाऱ्या सर्व कागदपत्रांची पुर्तता केली. त्यानुसार जिल्हा बँकेने तीन महिन्यांपूर्वी कर्ज देण्यास मान्यता दिली. कर्ज मिळताच डेअरी फार्म सुरू करण्यासाठी जय सर्व तयारी करत होता. रक्कम तातडीने मिळावे म्हणून बँकेत तो सतत पाठपुरावा करत होता. पण लवकर रक्कम मिळत नसल्याने तो निराश झाला.

‘सरकारने आता तरी जागे व्हावे’; मराठा तरुणाच्या आत्महत्येनंतर संभाजीराजेंचे आवाहन

पुनाळ ( ता. पन्हाळा )येथील जिल्हा बँक शाखेत कार्यरत असणारे बँक निरीक्षक राजेंद्र बेलेकर व शाखाधिकारी नामदेव खोत गेले तीन महिने मंजूर झालेले कर्ज देण्यास टाळाटाळ करत होते, असा आरोप आहे. त्यासाठी अनेकदा जय याने त्यांची भेट घेतली. कर्ज मंजूर आहे, ते लवकर द्या अशी मागणी तो करत होता. पण कर्जाची रक्कम न देण्यामागे कोणतेही ठोस कारण सांगितले जात नव्हते. त्यामुळे जय हा तणावाखाली होता. शेवटी या तणावातून त्याने विष पिवून आत्महत्या केली.

याबाबत त्याच्या मृत्यूची नोंद कोल्हापुरातील राजारामपुरी पोलीस ठाण्यात झाली होती. त्यानंतर हा गुन्हा कळे पोलीस ठाण्याकडे वर्ग झाला.

दरम्यान, मयत जयचे वडील बाळासाहेब डवंग यांनी दिलेल्या फिर्यादीनुसार बँकेच्या पुनाळ शाखेचे बँक निरीक्षक राजेंद्र आनंदा बेलेकर (रा. कळे, ता. पन्हाळा) आणि शाखाधिकारी नामदेव गुंडा खोत (रा. खोतवाडी) यांच्याविरोधात कळे पोलीस ठाण्यात गुन्हा नोंद झाला आहे. सहायक पोलीस निरीक्षक प्रमोद सुर्वे अधिक तपास करत आहेत .