फेसबुक युजर Rahis Ahmad Saifi ने (आर्काइव लिंक) १३ एप्रिल रोजी एक पोस्ट फेसबुकवर शेअर केली होती. यात युजरने लिहिलंय, ‘मेरठमधून भाजपकडून अरुण गोविल वाल्मिकी कार्यकर्त्याच्या घरी ‘भोजन दर्शन’साठी पोहोचले होते. भगवान श्रीरामांनी त्रेतायुगात शबरीची उष्टी बोरं खाल्ली होती आणि २०२४ मध्ये ते दलितांच्या घरचं अन्न खाऊ शकले नाहीत’.
अशाच प्रकारचा दावा Mahaveer jain (आर्काइव लिंक) नावाच्या एका युजरने एक्सवरही केला आहे.
तपासणीत काय आढळलं?
विश्वास न्यूजने सोशल मीडियावर केल्या जाणाऱ्या या दाव्यांचा तपास केला तेव्हा युजर्सनी केलेले हे दावे पूर्णपणे खोटे असल्याचं समोर आलं आहे. विश्वास न्यूज टीमने सोशल मीडियावर व्हायरल झालेल्या व्हिडिओची चौकशी करत असताना, त्याची कीफ्रेम काढून गुगल लेन्सच्या मदतीने सर्च केलं, त्यावेळी त्यांना अरुण गोविल यांच्या इन्स्टाग्राम हँडलवर या दाव्याचा संपूर्ण व्हिडिओ सापडला. अरुण गोविल यांनी यासंबंधीचा संपूर्ण व्हिडीओ आपल्या इंस्टाग्रामवर (आर्काइव लिंक) पोस्ट केला आहे.
इन्स्टाग्रामवर पोस्ट करत अरुण गोविल यांनी लिहिलंय, बूथ अध्यक्षा श्रीमती नीतू जाटव जी यांच्या निवासस्थानी स्थानिक लोकप्रतिनिधींसोबत भोजन आणि चर्चा कार्यक्रम आणि नगरसेवक अरुण माचल यांच्या निवासस्थानी चहापानावर चर्चा कार्यक्रम होता. या व्हिडिओमध्ये स्पष्टपणे दिसतंय, की त्यांनी तिथे जेवण केलं. यासोबतच व्हायरल झालेल्या व्हिडिओमध्ये दिसणारे लोकही या व्हिडिओमध्ये दिसत आहेत. यातून असं सिद्ध होतं, की व्हायरल व्हिडिओ दुसऱ्या अँगलने घेण्यात आला आहे. त्यामुळे व्हिडिओवर केला गेलेला दावा पूर्णपणे खोटा आहे.
व्हिडिओचा तपास करताना विश्वास न्यूजने अरुण गोविल यांचं फेसबुक पेजदेखील पाहिलं. इथे देखील १३ एप्रिलची एक पोस्ट (आर्काइव लिंक) आढळली, ज्यात हा व्हिडिओ होता. या व्हिडिओमध्येही अरुण गोविल जेवण करताना दिसत आहेत.
इतकंच नाही, तर दैनिक जागरणच्या १४ जुलैच्या मेरठ आवृत्तीत भाजपचे उमेदवार अरुण गोविल यांनी १३ एप्रिल रोजी सुबी भगवतपुरा परिसरातील नीतू जाटव यांच्या घरी खीर आणि पोळी-भाजी खाल्ल्याची बातमी प्रसिद्ध झाली होती. दलित कुटुंबाच्या घरी जेवण केलं नसल्याच्या आरोपावर अरुण गोविल म्हणाले की, हे काँग्रेसचं चुकीचं राजकारण आहे. अरुण गोविल यांनी त्यांना जमेल तेवढं खाल्लं आणि उरलेल्या अन्नापुढे आदराने नमस्कार केला.
विश्वास न्यूज टीमने याबाबत मेरठ महानगर भाजपचे संयोजक कमल दत्त यांच्याशीही चर्चा केली, त्यांनीही सांगितलं, की ‘मीदेखील कार्यक्रमाला उपस्थित होतो. अरुण गोविल यांनी भाजप कार्यकर्त्याच्या घरी जेवणं केलं. विरोधी पक्ष खोटे बोलत आहेत.’
निष्कर्ष
अरुण गोविल यांच्याबाबत सोशल मीडियावर केले जात असलेले दावे पूर्णपणे चुकीचे आहेत. त्यांनी एका दलित भाजप कार्यकर्त्याच्या घरी जेवण केलं. निवडणुकीदरम्यान काही युजर्स त्यातील अर्धा व्हिडिओ शेअर करत आहेत.
(This story was originally published by Vishvas News and republished by MT as part of the Shakti Collective.)