इस्रायलने सीरियामधील इराणच्या दूतावासावर १ एप्रिल रोजी केलेल्या हल्ल्यात इराणचे दोन लष्करी अधिकारी ठार झाले होते. याला प्रत्युत्तर देण्यासाठी इराणने इस्रायलवर शनिवारी तीनशे ड्रोन व क्षेपणास्त्रे डागली. मात्र त्यातील बहुतांश ड्रोन व क्षेपणास्त्रे इस्रायलने हवेतच नष्ट केली. यानंतरही इराणने इस्रायलवरील हल्ले सुरूच ठेवले आहेत. या संघर्षात इस्रायलला अमेरिका, ब्रिटन आदी देशांचा पाठिंबा लाभला आहे.
इराणकडून इस्रायलच्या दिशेने डागलेली किमान ८० ड्रोन तसेच, सहा क्षेपणास्त्रे अमेरिकेने हवेत नष्ट केली. याशिवाय, येमेनमधील हुती दहशतवाद्यांचे नियंत्रण असणाऱ्या क्षेत्रातून होणाऱ्या माऱ्यापैकी सात ड्रोन व एक क्षेपणास्त्र अमेरिकेने प्रक्षेपणापूर्वीच नष्ट केले, अशी माहिती पेंटागॉनने दिली.
‘इराण सातत्याने दुर्भावनापूर्ण व बेपर्वाईची भूमिका घेत असून त्यामुळे क्षेत्रीय स्थैर्यास बाधा पोहोचत आहे. यामुळे अमेरिका व अमेरिकेच्या मित्रराष्ट्रांच्या सुरक्षेस धोका निर्माण झाला आहे. इराणच्या या घातक कारवाईपासून इस्रायलचे संरक्षण करण्यासाठी अमेरिकेची सेंट्रल कमांड कटिबद्ध आहे,’ असेही पेंटागॉनतर्फे सांगण्यात आले.
जी-७ देशाच्या नेत्यांनीही रविवारी इराणचा कठोर शब्दांत निषेध केला. इराणने इस्रायलवर केलेल्या या थेट हल्ल्यामुळे मध्य पूर्वेत अनियंत्रित तणाव वाढण्याची शक्यता आहे, असे या नेत्यांनी म्हटले आहे. इराणने केलेला हा हल्ला म्हणजे संयुक्त राष्ट्रांच्या सनदेचे व आंतरराष्ट्रीय कायद्याचे उल्लंघन आहे, अशी प्रतिक्रिया इस्रायलने दिली.