हायलाइट्स:
- मुंबई पोलिसांना आणखी एक धक्का
- गुन्हे शाखेचा सहाय्यक पोलीस निरीक्षक लाच घेताना जाळ्यात
- नागेश पुराणिक असं पोलीस निरीक्षकाचं नाव
म. टा. खास प्रतिनिधी । मुंबई
ॲन्टिलिया स्फोटके आणि मनसुख हत्या प्रकरणापासून धुळीस मिळालेली प्रतिमा पुन्हा मिळविण्याचा प्रयत्न सुरू असतानाच मुंबई पोलिसांना शुक्रवारी आणखी एक धक्का बसला. गुन्हे शाखेच्या मालमत्ता कक्षातील सहाय्यक पोलीस निरीक्षक नागेश पुराणिक यांना ॲन्टी करप्शन ब्युरोच्या पथकाने दोन लाख रुपयांची लाच घेताना पकडले.
मालमत्ता कक्षाकडे बीएमडब्ल्यू कार चोरीचे प्रकरण तपासाकरीता आहे. या गुन्ह्यात एका महिलेचे पती आणि त्यांचा मित्र यांचा सहभाग आढळत होता. या दोघांवर कारवाई न करण्यासाठी नागेश पुराणिक यांनी १२ लाखांची मागणी केली. पती आणि त्यांच्या मित्राला कारवाईपासून वाचविण्यासाठी महिलेने चार लाख रुपये काही दिवसांपूर्वी दिले. उर्वरीत आठ लाखांसाठी पुराणिक तगादा लावू लागले. एवढी रक्कम जमविणे शक्य नसल्याने तडजोडी अंती आणखी चार लाख रुपये देण्याचे ठरले.
वाचा: काय होणार? परिवहन मंत्री अनिल परब यांना ईडीचे दुसऱ्यांदा समन्स
महिलेला चार लाखाची रक्कम जमा करणे अशक्य जात होते आणि पुराणिक पैशांसाठी मागे लागले असल्याने या महिलेने ॲन्टी करप्शन ब्युरोच्या कार्यालयात जाऊन तक्रार केली. तक्रारीची शहानिशा करून ॲन्टी करप्शन ब्युरोच्या पथकाने मालमत्ता कक्षाच्या भायखळा येथील कार्यालयात सापळा रचला. यावेळी तक्रारदार महिलेकडून दोन लाख रुपये घेताना पुराणिक यांना पकडण्यात आले. ॲन्टी करप्शन ब्युरोने त्यांच्या विरोधात गुन्हा दाखल केला आहे.
वाचा: डोंबिवली बलात्कार प्रकरणात आणखी धक्कादायक माहिती समोर