विद्यापीठांनी इस्रायलशी आर्थिक संबंध तोडावे आणि इस्रायल-हमास युद्धाला बळकटी देणाऱ्या कंपन्यांमधून पैसे काढून घ्यावेत, अशी मागणी हे विद्यार्थी आंदोलक करत आहेत. पोलिसांनी या आठवड्यात न्यूयॉर्क विद्यापीठामधून सुमारे १३३ आंदोलकांना ताब्यात घेतले असून येल विद्यापीठामधून सुमारे ४०हून अधिक आंदोलकांना सोमवारी अटक करण्यात आली.
येत्या काही दिवसांत न्यूयॉर्कमधील कोलंबिया विद्यापीठात पदवीदान समारंभ होणार असताना आवारातच विद्यार्थी आंदोलकांनी छावण्या उभारल्या आहेत. विद्यापीठ प्रशासनाने या छावण्या हटवण्यासाठी केलेले प्रयत्न अपयशी ठरले, सुमारे १००हून अधिक आंदोलक विद्यार्थ्यांना अटक झाली. अनेक विद्यापीठांत बुधवारी आंदोलनाने तीव्र रूप धारण केल्याने विद्यापीठांनी निदर्शकांना हुसकावून लावून पोलिसांना पाचारण केले. ऑस्टिन येथील टेक्सास विद्यापीठात पोलिसांनी जबरदस्तीने डझनभर आंदोलकांना अटक केल्यानंतर काही तासांतच सदर्न कॅलिफोर्निया विद्यापीठातील विद्यार्थ्यांना पोलिसांनी शांततेने अटक केली. सदर्न कॅलिफोर्निया विद्यापीठात कॉलेजमध्ये सर्वोत्कृष्ट शैक्षणिक कामगिरी करणाऱ्या पॅलिस्टाइन समर्थक विद्यार्थ्याचे नियोजित भाषण रद्द करण्यात आल्यानंतर विद्यापीठात तणाव वाढला होता. पोलिसांशी झटापट झाल्यानंतर विद्यार्थी आंदोलकांना पोलिसांनी ताब्यात घेतले.
तत्पूर्वी टेक्सासमध्ये पोलिस लाठ्या घेऊन आंदोलकांवर चालून गेले आणि विद्यापीठ प्रशासन व टेक्सासच्या गव्हर्नरच्या आदेशानुसार ३४ जणांना अटक केली. या आंदोलनाचे वार्तांकन करणाऱ्या एका वृत्तवाहिनीच्या छायाचित्रकाराला एका पोलिस अधिकाऱ्याने ढकलल्याचेही एका व्हिडीओत दिसून येत आहे. नंतर या छायाचित्रकाराला अटकही करण्यात आली. एक पत्रकारही हाणामारीत जखमी झाला. पोलिसांनी जमावावर नियंत्रण आणण्याचा प्रयत्न केल्यानंतर पोलिसांनी विद्यापीठातून काढता पाय घेतला.
टेक्सासमध्ये तिसऱ्या वर्षात शिकणाऱ्या डेन अर्कुहार्ट या विद्यार्थ्याने पोलिसांचा हस्तक्षेप आणि त्यांनी केलेल्या अटका ही तीव्र प्रतिक्रिया असल्याचे मत व्यक्त केले. पोलिस दल आक्रमक झाले नसते तर आंदोलन शांततेत पार पडले असते. या अटकसत्रांमुळे आता आणखी बरेच काही घडेल, अशी भीती त्याने व्यक्त केली.
विद्यापीठाचे अध्यक्ष जे हार्डझेल यांनी बुधवारी रात्री ‘आमचे नियम महत्त्वाचे असून त्यांची अंमलबजावणी केली जाईल. आमचे विद्यापीठ ताब्यात घेऊ दिले जाणार नाही,’ असे निवेदन जाहीर केले. तर, कॅलिफोर्निया स्टेट पॉलिटेक्निक विद्यापीठात सलग तिसऱ्या दिवशी बॅरिकेड बसण्यात आले होते. गेल्या आठवडाभरापासून विद्यापीठ बंदच असून व्हर्च्युअल वर्गातून विद्यार्थी धडे गिरवत आहेत.
ज्यू विद्यार्थ्यांमध्ये भीतीहार्वर्ड अंडरग्रॅज्युएट पॅलेस्टाइन सॉलिडॅरिटी कमिटीला विद्यापीठाने निलंबित केल्याच्या निषेधार्थ रॅली काढण्यात आली होती. मात्र मॅसॅशुसेट्स येथील हार्वर्ड विद्यापीठाने आंदोलकांना १४ तंबू उभारण्यापासून रोखले नाही. काही ज्यू विद्यार्थ्यांनी मात्र या आंदोलनाचा धसका घेतला आहे. पदवीप्रदान सोहळा अवघ्या काही दिवसांवर आला असल्याने त्यांना विद्यापीठाच्या आवारात पाऊल टाकण्यासही भीती वाटत आहे.