रोहिणी आचार्यांविरोधात लालूप्रसाद यादव! सारण लोकसभा मतदारसंघातून चुरशीची लढत

विजय महाले, वृत्तसंस्था, पाटणा : बिहारचे माजी मुख्यमंत्री आणि माजी केंद्रीय रेल्वेमंत्री लालूप्रसाद यादव यांची कन्या रोहिणी आचार्य या सारण मतदारसंघातून लोकसभा निवडणूक लढवित आहेत. त्यांना चक्क लालूप्रसाद यादव यांच्याशी सामना करावा लागणार आहे. मात्र, हे लालूप्रसाद यांचे पिता नसून सामान्य शेतकरी आहेत.
रायफल, पिस्तुल, महागड्या कार्स आणि कोट्यवधींचं कर्ज; किती आहे ब्रिजभूषण सिंह यांचा लेक करण भूषणची संपत्ती
रोहिणी या राष्ट्रीय जनता दलाच्या (राजद) उमेदवार आहेत. त्यांच्याविरोधात लालूप्रसाद हे राष्ट्रीय जनसंभावना पक्षाकडून (राजप) मैदानात उतरले आहेत. त्यांनी उमेदवारी अर्ज नुकताच दाखल केला. ‘सारण ही आपली कर्मभूमी असून स्थानिक जनता आपल्याला कौल देईल आणि आपण निवडून येऊ’, असा त्यांना आत्मविश्वास आहे. ‘राजप’चे लालूप्रसाद हे मढौरा परिसरातील जादो रहीमपूर येथील रहिवाशी आहेत. पंचायतपासून थेट राष्ट्रपती पदापर्यंतच्या विविध निवडणुकांमध्ये त्यांनी आपले नशिब आजमावलेले आहे. सामाजिक कार्यकर्ता असल्याने आपला जनसंपर्क दांडगा असल्याचा ते दावा करतात.
सत्ता गेल्यावर फडणवीसांना कोणी नमस्कारही करणार नाही, रवींद्र धंगेकर यांचा घणाघात
‘राजप’च्या लालूप्रसाद यांनी २०२२ मध्ये राष्ट्रपती पदाच्या निवडणुकीसाठी उमेदवारी अर्ज भरला होता. बिहारचे तत्कालीन राज्यपाल रामनाथ कोविंद यांच्याविरोधात देखील २०१७ मध्ये ते उतरले होते. या निवडणुकीत काँग्रेस आघाडीतर्फे लोकसभेच्या माजी अध्यक्षा व मूळच्या बिहारच्या असलेल्या मीराकुमार देखील होत्या. तेव्हा लालूप्रसाद यांचा अर्ज बाद झाला होता. माजी मुख्यमंत्री राबडीदेवी यांच्याविरोधातदेखील या लालूप्रसादांनी अर्ज भरला होता. आता रोहिणी यांच्याविरोधात लढत आहेत.

– लालूप्रसादांकडे पाच लाखांची रोकड
– साडेसतरा लाखांची अस्थायी मालमत्ता
– त्यांच्या पत्नीकडे दोन लाख रुपये रोख
– तसेच सव्वापाच लाख रुपयांची मालमत्ता