‘सर्व आरोप खोटे’; कथित ऑडिओक्लिप प्रकरणी रामदास कदम कोर्टात जाणार

मुंबई: भाजप नेते किरीट सोमय्या (Kirit Somaiya) यांनी राज्याचे परिवहन मंत्री अनिल परब (Anil Parab) यांच्यावर भ्रष्टाचाराचे आरोप केले आहेत. या पार्श्वभूमीवर परब यांच्यासदर्भातील माहिती सोमय्या यांना शिवसेनेचे नेते रामदास कदम यांनीच पुरवल्याचा धक्कादायक आरोप राष्ट्रवादी काँग्रेसचे माजी आमदार संजय कदम यांनी केले आहेत. या संदर्भात मनसे नेते आणि खेडचे नगराध्यक्ष वैभव खेडेकर आणि कदम यांनी कथित ऑडिओक्लिपही यांनी प्रसिद्ध केली आहे. या प्रकरणी रामदास कदम यांनी हे आरोप फेटाळून लावले आहेत. ही ऑडिओक्लिप खोटी असून या प्रकरणी आपण मुंबई उच्च न्यायालयात अब्रुनुकसानीचा दावा दाखल करणार असल्याचे कदम यांनी म्हटले आहे. (Shiv Sena leader Ramdas Kadam has revealed that the voice in the alleged audio clip is not mine)

कथित ऑडिओक्लिपमधील आवाज माझा नाही- कदम

या प्रकरणी रामदास कदम यांनी माध्यमांपुढे आपली बाजू मांडली आहे. त्या सर्व कथित क्लिप्समधील आवाज माझा नाही, असे कदम यांनी म्हटले आहे. तसेच माझ्यावर करण्यात आलेले सर्व आरोप धादांत खोटे असल्याचे ते म्हणाले.

क्लिक करा आणि वाचा- कोस्टल रोडच्या कामात १६०० कोटींचा भ्रष्टाचार; पालिकेच्या खुलाशानंतरही आमदार शेलार यांचा पुन्हा आरोप

अनिल परब माझे जवळचे मित्र

अनिल परब माझे जवळचे मित्र आहेत. ते माझ्या मुलाला कायम मदत करत असतात, असे स्पष्ट करताना मी तुळजाभवानीची शपथ घेऊन सांगतो की किरीट सोमय्यांशी मी संपर्क साधला नाही. या आरोपा तसूभरही सत्य नाही. एका ऑडिओक्लिपमध्ये मी असे म्हणताना दाखवले आहे की किरीट सोमय्या यांची पत्रकार परिषद संपल्यानंतर माझ्या घरी जेवायला घेऊन या. आता जी व्यक्ती माझ्या पक्षाच्या मुळावर उठलेली आहे, त्या व्यक्तीला मी घरी जेवायला बोलावेन का, असेही कदम यांनी म्हटले आहे.

क्लिक करा आणि वाचा- नागपूरच्या दीक्षाभूमीवर यावर्षी धम्मचक्र प्रवर्तन दिन सोहळा नाही

माझ्यावर आरोप करणाऱ्या दोघांनी कधीकाळी माझ्या हाताखाली काम केलेले आहे. शिवसेनेशी गद्दारी करुन ते दुसऱ्या पक्षात गेले आहेत. संजय कदम याला माझ्या मुलानेच निवणुकीत पराभूत केले आहे. आता माझा मुलगा आमदार आहे. त्याचा मोठ्या फरकाने पराभव झाल्याने आता तो माझी बदनामी करत आहे, असे कदम म्हणाले.

क्लिक करा आणि वाचा- मुंबईकरांकडून पैसे उकळणाऱ्या क्लीनअप मार्शलांवर होणार कठोर कारवाई

खेडचे नगराध्यक्ष वैभव खेडेकर यांची अनेक भ्रष्टाचाराची प्रकरणे मी स्वत: बाहेर काढली आहेत. त्यामुळेच त्यांनी माझ्या विरोधात मागील तीन महिन्यात दहा पत्रकार परिषदा घेतल्या आहेत. संजय कदम यांच्यावर मी यापूर्वीच सहा कोटीची अब्रुनुकसानीचा दावा टाकलेला आहे. वैभव खेडेकर यांच्यावरही दावा टाकला आहे. आता ते लोक खोट्या ऑडिओक्लिप पसरवून माझी बदनामी करत आहेत, असा आरोप कदम यांनी केला आहे.