व्हिडिओत स्वाती मालीवाल यांचा उल्लेख नाही –
केजरीवाल यांनी आपल्या अधिकृत सोशल मीडिया अकाऊंटवर व्हिडिओ शेअर केला आहे. २ मिनिटे ३३ सेकंदाच्या व्हिडिओमध्ये केजरीवाल यांनी आपले मत व्यक्त केले. त्यांनी या व्हिडिओमध्ये त्यांचे पीए बिभव कुमार यांचा उल्लेख केला, पण पक्षाच्या खासदार स्वाती मालीवाल यांच्याविषयी एक शब्दही बोलले नाहीत. केजरीवाल व्हिडिओत म्हणाले की, ”भाजप आम्हाला चिरडून टाकू शकत नाही. त्यांनी जेल जेल चा खेळ खेळू नये. आम आदमी पार्टी ही एक कल्पना आहे. तुम्ही जितक्या नेत्यांना तुरुंगात टाकाल तितकी आमची वाढ होईल.”
विभव कुमार यांचा अटकपूर्व जामीन नामंजूर –
केजरीवाल यांचे पीए बिभव कुमार यांना आज (१८ मे) आप खासदार स्वाती मालीवाल यांच्यासोबत मारहाण आणि गैरवर्तन केल्याप्रकरणी दिल्ली पोलिसांकडून अटक करण्यात आली. त्यांनी तीज हजारी न्यायालयात अटकपूर्व जामिनासाठी अर्ज केला होता, परंतु न्यायालयाने जामीन देण्यास नकार दिला आहे.
स्वाती मालीवाल यांच्यावर आपचा आरोप –
स्वाती मालीवाल या आपच्या खासदार असून स्वत:च्या पक्षानेच त्यांच्यावर आरोप केले आहेत. आपच्या नेत्या आतिशी यांनी पत्रकार परिषद घेत मालीवाल यांच्यावर आरोप केले आहेत. आतिशी म्हणाल्या की, ”स्वाती मालीवाल या भाजपचा मोहरा आहेत. त्यांना (१३ मे) रोजी केजरीवाल यांच्या घरी पाठवण्यात आले. केजरीवाल यांच्यावर खोटे आरोप करणे हा मुख्य हेतू होता.” परंतु केजरीवाल यांनी आज शेअर केलेल्या व्हिडिओ मध्ये स्वाती मालीवाल यांचे नाव घेण्याचे टाळले असून त्यांनी थेट भाजपवर हल्लाबोल केला आहे.